മേപ്പയൂർ : മേപ്പയൂർ അത്തിക്കോട്ട് പാലം കുറ്റിപ്പുറത്ത് താഴ റോഡില് വെള്ളക്കെട്ട് നിറഞ്ഞ നിലയിൽ. ഒറ്റമഴ പെയ്താൽ മതി റോഡും തോടും ഒന്നാകാന്. മുട്ടിനുമേല് വെള്ളത്തിലൂടെയാണ് പ്രദേശവാസികളും മറ്റുള്ളവരും യാത്രചെയ്യുന്നത്. രാവിലെയും വൈകിട്ടും തിരക്കേറുന്ന സമയത്തു കാൽ നടയായും സൈക്കിളിലും സഞ്ചരിക്കുന്ന വിദ്യാർത്ഥികൾ ഭയന്നാണ് ഇതുവഴി പോകുന്നത്.
ജനകീയ ഇടപെടലുകളെ തുടർന്ന് അത്തിക്കോട്ട് പാലം മുതൽ റോഡ് കോൺഗ്രീറ്റ് ചെയ്യാൻ ഫണ്ട് പാസായെങ്കിലും ഇതുവരെ പണി നടന്നില്ല. സ്കൂൾ വിദ്യാർഥികൾ ഉൾപ്പെടെ നിരവധി പേർ യാത്ര ചെയ്യുന്ന റോഡിൽ മഴക്കാലമായാല് വെള്ളം കെട്ടിനിൽക്കുന്ന അവസ്ഥയാണ്.
മേപ്പയൂർ ഗവൺമെന്റ് ഹയർ സെക്കൻഡറി സ്കൂളിലേക്ക് വിദ്യാർഥികൾ ഈ റോഡ് വഴിയാണ് യാത്ര ചെയ്യേണ്ടത്. അടിയന്തരമായി റോഡ് ഗതാഗതയോഗ്യമാക്കാൻ പഞ്ചായത്ത് അധികൃതർ തയാറാവണമെന്നതാണ് നാട്ടുകാരുടെ ആവശ്യം