കോന്നി : മാസങ്ങൾക്ക് മുമ്പ് പകുതി ടാറിങ് കഴിഞ്ഞ പ്രമാടം – മറൂർ – പൂങ്കാവ് റോഡ് ടാറിങ് ഇളകി. സംസ്ഥാന സർക്കാർ ബഡ്ജറ്റിൽ ഏഴ് കോടി രൂപ തുക വകയിരുത്തി ബി എം ആൻഡ് ബി സി നിലവാരത്തിൽ ടാറിങ് ആരംഭിച്ച റോഡിൽ മൂന്ന് ഭാഗമാണ് ടാറിങ് ഇളകി മാറിയത്. മൂന്ന് കിലോമീറ്റർ ദൂരമാണ് റോഡ് കടന്നുപോകുന്നത്.
ടാറിങ് ഇളകി മാറിയ ഭാഗത്തിന്റെ കാരണം കണ്ടുപിടിക്കാൻ പരിശോധനകൾക്ക് അയച്ചപ്പോൾ ഈ ഭാഗത്ത് ഡീസലിന്റെ അംശം ഉണ്ടെന്ന് കണ്ടെത്തിയിരുന്നു എന്ന് അധികൃതർ പറഞ്ഞു. നിരവധി വാഹനങ്ങൾ ദിവസേന സഞ്ചരിക്കുന്ന റോഡിൽ ടാറിങ് ഇളകിയ ഭാഗത്ത് പാറപ്പൊടി ഇട്ട് കുഴി നികത്തുകയും ചെയ്തിട്ടുണ്ട്. ഈ ഭാഗം വീണ്ടും ടാർ ചെയ്യേണ്ടി വരും. നിർമ്മാണത്തിലെ അപാകതയാണ് ടാറിംഗ് ഇളകിയതിന് കാരണം എന്നും നാട്ടുകാർ പറയുന്നു.
