കോട്ടയം: കോടിമതയില്‍ നിര്‍ത്തിയിട്ടിരുന്ന ലോറിയില്‍നിന്ന് സാധനങ്ങള്‍ കവര്‍ന്നകേസില്‍ രണ്ടുപേര്‍ അറസ്റ്റില്‍. തിരുവനന്തപുരം ആര്യനാട് കാഞ്ഞിരത്തിന്‍മൂട് ദ്വാരകയില്‍ എം.ആര്‍. വിനു (39), തൃശൂര്‍ മണലിത്തറ കൈപ്പറമ്പില്‍ കെ.പി.പ്രിന്‍സ് (38) എന്നിവരെയാണ് കോട്ടയം വെസ്റ്റ് സ്റ്റേഷന്‍ ഹൗസ് ഓഫീസര്‍ ഇന്‍സ്പെക്ടര്‍ എം.ജെ. അരുണ്‍ അറസ്റ്റ് ചെയ്തത്.
കഴിഞ്ഞ 22ന് രാത്രി കോടിമതയില്‍ എം.ജി റോഡിരികില്‍ നിര്‍ത്തിയിട്ടിരുന്ന വെള്ളാറ കണ്‍സ്ട്രക്ഷന്‍സിന്റെ രണ്ട് ലോറികളില്‍നിന്ന് പടുത, സ്പീഡോ മീറ്റര്‍, ഡ്രൈവര്‍ സീറ്റ് എന്നിവ മോഷ്ടിക്കുകയായിരുന്നു. കോടിമതയില്‍ നിര്‍ത്തിയിടുന്ന ലോറികളില്‍നിന്ന് സീറ്റുകള്‍ അടക്കമുള്ളവ ഊരിയെടുക്കുന്നതായി നേരത്തേയും പരാതിയുണ്ടായിരുന്നു.
പ്രിന്‍സിപ്പല്‍ എസ്.ഐ ടി. ശ്രീജിത്ത്, പ്രബേഷന്‍ എസ്.ഐ ആഖില്‍ ദേവ്, ഗ്രേഡ് എസ്.ഐ നാരായണന്‍ ഉണ്ണി, എ.എസ്.ഐമാരായ ബിജു കുര്യാക്കോസ്, പി.എന്‍ മനോജ് എന്നിവരുടെ നേതൃത്വത്തിലാണ് പിടികൂടിയത്.
