ചെര്‍പ്പുളശ്ശേരി : നിക്ഷേപകരില്‍നിന്ന് ലക്ഷങ്ങള്‍ സമാഹരിച്ച ശേഷം അടച്ചുപൂട്ടിയ സംഘ്പരിവാര്‍ നേതൃത്വത്തിലുള്ള ചെര്‍പ്പുളശ്ശേരിയിലെ ഹിന്ദുസ്ഥാന്‍ ഡെവലപ്മെന്റ് ബെനിഫിറ്റ്സ് (എച്ച്‌.ഡി.ബി) നിധി ലിമിറ്റഡിന്റെ പ്രമോട്ടറും പ്രധാന നടത്തിപ്പുകാരനുമായ സുരേഷ് കൃഷ്ണയെ (45) അറസ്റ്റ് ചെയ്തു. ആര്‍.എസ്.എസ് മുന്‍ ചുമതലക്കാരനാണ് ഇയാള്‍. മറ്റ് ഡയറക്ടര്‍മാരുടെയും നിക്ഷേപകരുടെയുമായി മൂന്ന് പരാതികള്‍ സുരേഷ് കൃഷ്ണക്കെതിരെ ലഭിച്ചതിനെ തുടര്‍ന്ന് വഞ്ചനക്കുറ്റത്തിന് കേസെടുത്തിരുന്നു. ബി.ജെ.പി-ആര്‍.എസ്.എസ് പ്രവര്‍ത്തകരാണ് പരാതി നല്‍കിയവര്‍.
ഒളിവില്‍പോയ സുരേഷിനെ ചൊവ്വാഴ്ച ചിറ്റൂരില്‍വെച്ചാണ് അറസ്റ്റ് ചെയ്തത്. സംഘ്പരിവാര്‍ സംഘടനകളിലെ പ്രാദേശിക നേതാക്കളാണ് എച്ച്‌.ഡി.ബി നിധി ലിമിറ്റഡിന്റെ നടത്തിപ്പുകാര്‍. ഹിന്ദുബാങ്ക് എന്ന് പ്രചരിപ്പിച്ചാണ് നിക്ഷേപം ക്ഷണിച്ചിരുന്നത്. ഒരു കോടിയലധികം രൂപ സമാഹരിച്ചിരുന്നു. ആര്‍.എസ്.എസ്, ബി.ജെ.പി പ്രവര്‍ത്തകരില്‍നിന്നും അനുഭാവികളില്‍നിന്നുമാണ് ഓഹരിയും നിക്ഷേപവും സ്വീകരിച്ചത്.
കീഴൂര്‍ റോഡ് പത്തായപ്പുര പ്രദീപും ഭാര്യ അമൃതയുടേയും പേരില്‍ ഓരോ ലക്ഷം രൂപ കമ്പനിയില്‍ നിക്ഷേപിച്ചിരുന്നു. ഈ തുകക്ക് ആനുകൂല്യം നല്‍കിയില്ലെന്നാണ് പ്രദീപിന്റെ പരാതി. സേവാഭാരതി പഞ്ചായത്ത് ഭാരവാഹിയും ഹരീഷ് എന്ന മറ്റൊരാളും പരാതി നല്‍കിയിരുന്നു. ഒറ്റപ്പാലം ജുഡീഷ്യല്‍ ഫസ്റ്റ് ക്ലാസ് കോടതിയില്‍ ഹാജരാക്കിയ സുരേഷ് കൃഷ്ണയെ 15 ദിവസത്തേക്ക് റിമാന്‍ഡ് ചെയ്തു.
