കോഴിക്കോട്: റബ്ബറിന് 300 രൂപ തറ വില പ്രഖ്യാപിക്കണമെന്ന ആവശ്യവുമായി സിപിഎം പ്രക്ഷോഭത്തിലേക്ക്. പാര്ട്ടിയുടെ കര്ഷക സംഘടനയായ കേരള കര്ഷക സംഘമാണ് ഈ ആവശ്യവുമായി പ്രതിഷേധത്തിന് ഇറങ്ങുന്നത്. ജൂണ് 6 ന് താമരശ്ശേരിയില് സമരസായാഹ്നം സംഘടിപ്പിക്കുമെന്ന് കേരള കര്ഷകസംഘം അറിയിച്ചു. റബര് വിലയില് തലശേരി ബിഷപ്പ് ബിജെപി നേതൃത്വത്തോട് ഉന്നയിച്ച ആവശ്യം ഏറ്റെടുത്തിരിക്കുകയാണ് സിപിഎം.
റബ്ബറിന് 300 രൂപ വില നിശ്ചയിച്ചാല് ബിജെപിക്ക് ഒരു എംപിയെ നല്കാമെന്ന തലശ്ശേരി ആര്ച്ച് ബിഷപ്പ് ജോസഫ് പാംപ്ലാനിയുടെ പ്രസ്താവന വലിയ വിവാദമായിരുന്നു. റബ്ബര് വില 300 രൂപയാക്കിയാല് ബിജെപിക്ക് കേരളത്തില് ഒരു എംപി പോലുമില്ലെന്ന വിഷമം പരിഹരിക്കുമെന്നും അദ്ദേഹം പറഞ്ഞിരുന്നു. കത്തോലിക്കാ കോണ്ഗ്രസ് തലശ്ശേരി അതിരൂപത സംഘടിപ്പിച്ച കര്ഷക റാലിയിലായിരുന്നു ആര്ച്ച് ബിഷപ്പിന്റെ പ്രതികരണം. കുടിയേറ്റ ജനതയ്ക്ക് അതിജീവനം വേണമെങ്കില് രാഷ്ട്രീയമായി പ്രതികരിക്കണമെന്നാണ് ആര്ച്ച് ബിഷപ്പിന്റെ നിലപാട്. ജനാധിപത്യത്തില് വോട്ടായി മാറാത്ത ഒരു പ്രതിഷേധവും പ്രതിഷേധമല്ലെന്ന സത്യം കര്ഷകര് തിരിച്ചറിയണമെന്നും ആര്ച്ച് ബിഷപ്പ് ജോസഫ് പാംപ്ലാനി പറഞ്ഞിരുന്നു.
