കൊച്ചി : നടന് ദിലീപ് പ്രതിയായ വധ ഗൂഢാലോചനാ കേസില് സൈബര് വിദഗ്ദ്ധന് സായി ശങ്കര് ക്രൈംബ്രാഞ്ചിന്റെ ചോദ്യംചെയ്യലിന് ഇന്ന് ഹാജരാവില്ല. കൊവിഡ് ലക്ഷണമുളളതിനാല് പത്തുദിവസത്തെ സാവകാശമാണ് അദ്ദേഹം ആവശ്യപ്പെട്ടിരിക്കുന്നത്. കേസുമായി ബന്ധപ്പെട്ട് നടന് ദിലീപിന്റെ ഫോണിലെ വിവരങ്ങള് നശിപ്പിച്ചെന്ന കണ്ടെത്തലിനെ തുടര്ന്നാണ് ഇന്നു രാവിലെ പത്തുമണിക്ക് കളമശേരി ക്രൈംബ്രാഞ്ച് ഓഫീസില് ചോദ്യംചെയ്യലിന് ഹാജരാകണമെന്നാവശ്യപ്പെട്ട് അന്വേഷണ സംഘം സായി ശങ്കറിന് നോട്ടീസ് നല്കിയത്.
ഫോണിലുണ്ടായിരുന്ന സുപ്രധാന തെളിവുകള് കൊച്ചിയിലെ അഭിഭാഷകന്റെ ഓഫീസില് വച്ചും ഒരു സ്വകാര്യ ഹോട്ടലില് വെച്ചും നശിപ്പിച്ചു എന്നാണ് ക്രൈബ്രാഞ്ച് കണ്ടെത്തിയത്. എന്നാല് തെളിവുകള് നശിപ്പിച്ചിട്ടില്ലെന്നും ദിലീപിന്റെ ഫോണിലുണ്ടായിരുന്ന വ്യക്തിപരമായ ചില വിവരങ്ങള് കോപ്പിചെയ്ത് കൊടുക്കുക മാത്രമാണ് താന് ചെയ്തതെന്നാണ് സായി ശങ്കര് പറയുന്നത്. തന്നെ കേസില് പ്രതിയാക്കാന് നീക്കം നടക്കുന്നുണ്ടെന്നും ദിലീപിന്റെ അഭിഭാഷകര്ക്കെതിരെ മൊഴിനല്കാന് പോലീസ് നിര്ബന്ധിക്കുന്നുവെന്നും ആരോപിച്ച് അദ്ദേഹം രംഗത്തുവരികയും ചെയ്തു.
ഇന്നലെ സായി ശങ്കറിന്റെ കോഴിക്കോട്ടെ ഫ്ലാറ്റില് ക്രൈംബ്രാഞ്ച് ഉദ്യാഗസ്ഥര് റെയ്ഡ് നടത്തിയിരുന്നു. കാരപ്പറമ്പില് ഹോമിയോ മെഡിക്കല് കോളേജ് ആശുപത്രിക്കു സമീപമുള്ള അപ്പാര്ട്ട്മെന്റില് 16ാം നിലയിലുള്ള സായി ശങ്കറിന്റെയും ഭാര്യാപിതാവിന്റെയും ഉടമസ്ഥതയിലുള്ള രണ്ട് ഫ്ലാറ്റുകളിലായിരുന്നു ആറംഗ സംഘത്തിന്റെ റെയ്ഡ്. രാവിലെ 8.15ന് ആരംഭിച്ച പരിശോധന നാലര മണിക്കൂര് നീണ്ടു. സായി ശങ്കര് വീട്ടിലുണ്ടായിരുന്നില്ല. സുപ്രധാന തെളിവുകള് എന്തെങ്കിലും ഇവിടെനിന്ന് ലഭിച്ചോ എന്ന് വ്യക്തമല്ല.
