ന്യൂഡല്‍ഹി : രാജ്യം പൂര്‍ണമായി അടച്ചിട്ടതോടെ പച്ചക്കറികളുടെയും പഴങ്ങളുടെയും ആവശ്യകത 60 ശതമാനം കുറഞ്ഞു. ഇതേതുടര്‍ന്ന് വിപണിയില്‍നിന്ന് മൊത്തവിതരണക്കാര്‍ പിന്‍വാങ്ങിയതായി കച്ചവടക്കാര്‍ പറയുന്നു. ഹോട്ടലുകള്‍, ധാബകള്‍, റസ്റ്ററന്റുകള്‍ എന്നിവ അടഞ്ഞതോടെയാണ് വില്പനയില്‍കാര്യമായ കുറവുണ്ടായത്.
രാജ്യമൊട്ടാകെ 21 ദിവസത്തെ അടച്ചിടല്‍ പ്രഖ്യാപിച്ചതോടെ അവശ്യസാധനങ്ങളുടെ ചരക്കുനീക്കം മാത്രമാണ് നടക്കുന്നത്. പലസംസ്ഥാനങ്ങളും അന്യസംസ്ഥാന വാഹനങ്ങള്‍ കടത്തിവിടാതായതോടെ മൊത്തകച്ചവടക്കാരെ കാര്യമായി ബാധിച്ചു.
രാജ്യത്തെ ഏറ്റവുംവലിയ ഉള്ളി മൊത്തവിപണിയായ നാസിക്കിലെ ലസല്‍ഗോവിലെ മാര്‍ക്കറ്റ് കഴിഞ്ഞയാഴ്ച അടച്ചിരുന്നു. ആവശ്യകത കുറഞ്ഞതോടെ ഉള്ളി, ഉരുളക്കിഴങ്ങ്, തക്കാളി, മറ്റ് പച്ചക്കറികള്‍ എന്നിവയുടെ വിലയില്‍ കുറവുണ്ടായിട്ടുണ്ടെന്നും വ്യാപാരികള്‍ പറയുന്നു.
