സിനിമാ പ്രേമികൾ ഒന്നടങ്കം കാത്തിരിക്കുന്ന ഈ വർഷത്തെ പുരാണ ചിത്രങ്ങളിലൊന്നാണ് ശാകുന്തളം. ശകുന്തളയായി സാമന്ത റൂത്ത് പ്രഭു എത്തുന്ന സിനിമയുടെ റിലീസ് അടുത്ത മാസമാണ്. പ്രദർശനത്തിന് മുന്നോടിയായി ശാകുന്തളം സിനിമാ സംഘവും നടി സാമന്തയും ഹൈദരാബാദിലെ ശ്രീ പെഡ്ഡമ്മ താലി ക്ഷേത്ര ദർശനത്തിന് എത്തിയ ചിത്രവും വീഡിയോകളുമാണ് ഇപ്പോൾ വൈറലാവുന്നത്.ദിവസവും രാവിലെ ദേവിയെ പ്രാർത്ഥിച്ചതിന് ശേഷമാണ് ദിനം തുടങ്ങാറുള്ളത്. അതുപോലെ ദേവിയുടെ അനുഗ്രഹം തേടിയതിന് ശേഷം ശാകുന്തളത്തിന്റെ പ്രമോഷൻ തുടങ്ങാനാണ് ആഗ്രഹിക്കുന്നതെന്ന് സാമന്ത പ്രതികരിച്ചു.
ക്ഷേത്രത്തിലേക്കുള്ള യാത്രാമദ്ധ്യേ കാറിനുള്ളിലിരുന്നാണ് സാമന്ത ഇക്കാര്യങ്ങൾ പങ്കുവയ്‌ക്കുന്നത്. തുടർന്ന് ഈ വീഡിയോ ഇൻസ്റ്റഗ്രാമിൽ പോസ്റ്റ് ചെയ്യുകയായിരുന്നു. വെള്ള കുർത്തയിൽ അതിസുന്ദരിയായി എത്തിയ സാമന്തയുടെ ഒപ്പം സഹതാരം ദേവ് മോഹനുമുണ്ട്. ശകുന്തള-ദുഷ്യന്തൻ പ്രണയകഥയായ അഭിജ്ഞാന ശാകുന്തളം എന്ന കൃതിയെ ആസ്പദമാക്കി എത്തുന്ന സിനിമയാണ് ശാകുന്തളം. ഏപ്രിൽ 14ന് ചിത്രം റിലീസ് ചെയ്യുമെന്നാണ് സൂചന. സൂഫിയും സുജാതയും എന്ന സിനിമയിലൂടെ മലയാളികൾക്ക് സുപരിചതനാണ് ദുഷ്യന്തനായെത്തുന്ന ദേവ് മോഹൻ.
