ഡല്‍ഹി : ഭാര്യ ജീവിച്ചിരിക്കുമ്പോള്‍ രണ്ടാം വിവാഹത്തിന് അനുമതി നല്‍കുന്നത് നിയമവിരുദ്ധമാണെന്ന് ചൂണ്ടിക്കാട്ടി സുപ്രീംകോടതിയില്‍ ഹര്‍ജി. അഭിഭാഷകനായ വിഷ്ണു ശങ്കര്‍ ജെയിനാണ് സുപ്രീംകോടതിയില്‍ ഹര്‍ജി നല്കിയിട്ടുള്ളത്.
ഇന്ത്യന്‍ ശിക്ഷാ നിയമത്തിന്റെ 494-ാ൦ വകുപ്പ്, ഭാര്യയോ ഭര്‍ത്താവോ ജീവിച്ചിരിക്കുമ്പോള്‍ വിവാഹമോചനം നേടാതെ രണ്ടാം വിവാഹം കഴിക്കുന്നത് കുറ്റകരമാണെന്ന് അനുശാസിക്കുന്നുണ്ട്. എന്നാല്‍, മുസ്ലീമുകള്‍ക്ക് ശരിയത്ത് നിയമപ്രകാരം വിവാഹമോചനം നേടാതെ 4 വിവാഹം വരെ കഴിക്കാം എന്നാണ്. ഇക്കാര്യം നിയമവിരുദ്ധമാണെന്നും സ്ത്രീകളുടെ അവകാശങ്ങളെ ഹനിക്കുന്നതാണെന്നും ചൂണ്ടിക്കാട്ടിയാണ് ഹര്‍ജി നല്കിയിട്ടുള്ളത്.
മറ്റുമതത്തില്‍പ്പെട്ടവര്‍ ഇത്തരത്തില്‍ രണ്ടാമത് വിവാഹം കഴിച്ചാല്‍ അത് കുറ്റകരമാണ്. അതുകൊണ്ടു തന്നെ, മുസ്ലീമുകള്‍ക്കു മാത്രം ഇതിനു അനുമതി നല്‍കുന്നത് തീര്‍ത്തും വിവേചനപരമാണെന്നാണ് ഹര്‍ജിയില്‍ പറയുന്നത്. ഇതിനു പുറമെ, മുസ്ലീം മതവിശ്വാസികള്‍ക്ക് ആദ്യ ഭാര്യ ജീവിച്ചിരിക്കുമ്പോള്‍ രണ്ടാമതും വിവാഹം കഴിക്കാമെന്ന ശരിയത്ത് നിയമം, ആര്‍ട്ടിക്കിള്‍ 14 -ന്റേയും ആര്‍ട്ടിക്കിള്‍ 15(1)-ന്റേയും ലംഘനമാണെന്നും ആയതിനാല്‍ അത് ഭരണഘടനാ വിരുദ്ധമാണെന്നും ഹര്‍ജിയില്‍ അഭിഭാഷകന്‍ ചൂണ്ടിക്കാട്ടിയിട്ടുണ്ട്.
