തിരുവനന്തപുരം : സണ്ണി ജോസഫ് മന്ത്രിയായതോടെ പുതിയ കെപിസിസി അധ്യക്ഷനെ നിയമിക്കുന്നതുമായി ബന്ധപ്പെട്ട ചർച്ചകൾ കോൺഗ്രസ് ഹൈക്കമാൻഡ് നടത്തിവരികയാണ്. പുതിയ കെപിസിസി അധ്യക്ഷനെ നിയമിക്കുന്നതിൽ മുഖ്യമന്ത്രി വിഡി സതീശന്റെയും മുൻ കെപിസിസി പ്രസിഡന്റ് വി എം സുധീരന്റെയും നിലപാട് നിർണായകമായേക്കും. കൂടിയാലോചനകളും ലോബിയിങ്ങും പുരോഗമിക്കുന്നതിനിടെ ലോക്സഭാ ചീഫ് വിപ്പ് കൊടിക്കുന്നിൽ സുരേഷിനെ കെപിസിസി പ്രസിഡന്റ് സ്ഥാനത്തേക്ക് സതീശൻ-സുധീരൻ ക്യാമ്പ് പിന്തുണയ്ക്കുന്നുവെന്നാണ് റിപ്പോർട്ടുകൾ. ഈ നീക്കത്തിലൂടെ പാര്ട്ടിയിലും സര്ക്കാരിലും തന്റെ സ്വാധീനം ഉറപ്പിക്കാന് സതീശന് ശ്രമിക്കുന്നതായി വിലയിരുത്തപ്പെടുന്നു. മുഖ്യമന്ത്രി സ്ഥാനത്തിനായി സതീശനും കോണ്ഗ്രസ് ജനറല് സെക്രട്ടറി കെ സി വേണുഗോപാലും തമ്മിലുള്ള തീവ്രമായ പോരാട്ടത്തിനിടയിലാണ് പുതിയ സമവാക്യം രൂപപ്പെട്ടതെന്ന് കരുതപ്പെടുന്നു. ന്യൂഡല്ഹിയില് പാര്ട്ടി ഹൈക്കമാന്ഡിന് മുന്നില് വിഡി സതീശന് വേണ്ടി ലോബിയിങ് ചെയ്യുന്നതില് വി എം സുധീരന് നിര്ണായക പങ്ക് വഹിച്ചതായി പറയപ്പെടുന്നു. ഇത് സതീശനും സുധീരനും തമ്മിലുള്ള അടുപ്പം ശക്തമാകാന് കാരണമായിട്ടുണ്ട്.
കൊടിക്കുന്നില് സുരേഷിന് പുറമേ മുന് യുഡിഎഫ് കണ്വീനറായ ബെന്നി ബെഹനാന് എംപിയാണ് പരിഗണനയിലുള്ള മറ്റൊരു നേതാവ്. പുതിയ സാഹചര്യത്തില് കെപിസിസി പ്രസിഡന്റ് സ്ഥാനത്തേക്ക് കൊടിക്കുന്നില് സുരേഷ്- ബെന്നി ബെഹനാന് എന്നിവര് തമ്മില് നേരിട്ടുള്ള പോരിന് കളമൊരുങ്ങുന്നുവെന്നാണ് സൂചന. മുഖ്യമന്ത്രി വിഡി സതീശന് തന്റെ നിലപാട് കോണ്ഗ്രസ് ഹൈക്കമാന്ഡിനെ അറിയിച്ചുവെന്നാണ് റിപ്പോര്ട്ട്.
