റിയാദ് : ന്യൂഡല്‍ഹി വേള്‍ഡ് ബുക്ക് ഫെയറിലെ ഈ വര്‍ഷത്തെ അതിഥിരാഷ്ട്രമായി സൗദി അറേബ്യയെ തെരഞ്ഞെടുത്തു. ഫെബ്രുവരി 10 മുതല്‍ 18 വരെ ന്യൂഡല്‍ഹിയിലെ പ്രഗതി മൈതാനിലാണ് ന്യൂഡല്‍ഹി വേള്‍ഡ് ബുക്ക് ഫെയര്‍ നടക്കുന്നത്. വിദ്യാഭ്യാസ മന്ത്രാലയത്തിന് കീഴിലുള്ള നാഷനല്‍ ബുക്ക് ട്രസ്റ്റ് ഓഫ് ഇന്ത്യയാണ് സംഘാടകര്‍. ലോകത്തിലെ ഏറ്റവും വലിയ അന്താരാഷ്ട്ര പുസ്തകമേളകളിലൊന്നായ ഈ മേളയില്‍ സൗദി അറേബ്യയുടെ വിജ്ഞാനശേഖരം, പൈതൃകം, പുരാവസ്തുക്കള്‍, സംസ്‌കാരം, കലകള്‍ എന്നിവ ഇന്ത്യയിലെ സുഹൃത്തുക്കള്‍ക്ക് പരിചയപ്പെടുത്താനുള്ള അവസരമാണ് ലഭിക്കുക. സൗദി പാചകരീതികളും രാജ്യത്തിന്റെ പരമ്പരാഗത കലാരൂപങ്ങളും പരിചയപ്പെടുത്തുന്നതിന് രണ്ട് ആഘോഷങ്ങളും ഇതോടൊപ്പം സംഘടിപ്പിക്കും.
സൗദിയിലെ പ്രസിദ്ധീകരണ സ്ഥാപനങ്ങളുടെ നേതൃത്വത്തില്‍ സെമിനാറുകള്‍, ഡയലോഗ് സെക്ഷനുകള്‍, എഴുത്തുകാര്‍ എന്നിവരെ ഉള്‍ക്കൊള്ളുന്ന വൈവിധ്യമാര്‍ന്ന സാംസ്‌കാരിക പരിപാടി എക്സിബിഷനില്‍ പ്രദര്‍ശിപ്പിക്കും. സന്ദര്‍ശകര്‍ക്ക് മികച്ച സാംസ്‌കാരിക അനുഭവം നല്‍കുന്നതിന് സൗദി സാഹിത്യ- പ്രസിദ്ധീകരണ-വിവര്‍ത്തന കമ്മീഷന്‍ വിവിധ പരിപാടികള്‍ സംഘടിപ്പിക്കും. 600-ലധികം രാജ്യാന്തര പ്രസിദ്ധീകരണ സ്ഥാപനങ്ങള്‍ പങ്കെടുക്കും. കിങ് അബ്ദുല്‍ അസീസ് ഫൗണ്ടേഷന്‍ ഫോര്‍ റിസര്‍ച്ച് ആന്‍ഡ് ആര്‍ക്കൈവ്‌സിന് (ദാറ) പുറമെ ഹെറിറ്റേജ് കമ്മീഷന്‍, മ്യൂസിക് കമ്മീഷന്‍, ഫിലിം കമ്മീഷന്‍, പാചക കല കമ്മീഷന്‍, ഫാഷന്‍ കമ്മീഷന്‍ എന്നിവയും സൗദിയിലെ വിവിധ സാംസ്‌കാരിക മേഖലകളെ പ്രതിനിധീകരിച്ച് മേളയില്‍ പങ്കെടുക്കും. സാംസ്‌കാരികം, കല, സാഹിത്യം, വൈജ്ഞാനിക മേഖലകളുമായി ബന്ധപ്പെട്ട സെമിനാറുകള്‍, ഡയലോഗ് സെഷനുകള്‍, വൈവിധ്യമാര്‍ന്ന സാംസ്‌കാരിക പരിപാടികള്‍ എന്നിവയില്‍ സൗദിയുടെ സജീവ പങ്കാളിത്തമുണ്ടാവും. സൗദിയുടെ സര്‍ഗ്ഗാത്മക മേഖലയെയും പുരാതന സംസ്‌കാരത്തെയും പരിചയപ്പെടുത്തുന്ന പരിപാടികളും സംഘടിപ്പിക്കും.
