തിരുവനന്തപുരം: കോവിഡ് വ്യാപനത്തിന്റെ പശ്ചാത്തലത്തില്‍ സംസ്ഥാനത്ത് സ്‌കൂളുകള്‍ തുറക്കുന്നത് 2021 ജനുവരിയിലേയ്ക്ക് നീട്ടേണ്ടി വരുമെന്ന് മുഖ്യമന്ത്രി പിണറായി വിജയന്‍. കോവിഡ് വ്യാപനം രൂക്ഷമായതോടെ പ്രഖ്യാപിച്ച ലോക്ക്ഡൗണ്‍ മുതല്‍ മാസങ്ങളോളമായി വിദ്യാര്‍ത്ഥികള്‍ വിദ്യാലയാന്തരീക്ഷത്തില്‍ മാറി നില്‍ക്കുകയാണ്.
ഈ സാഹചര്യത്തില്‍ 2021ല്‍ പുതിയ അധ്യയന വര്‍ഷം ആരംഭിക്കുമ്പോള്‍ അവര്‍ക്ക് വേണ്ട സൗകര്യങ്ങളും മറ്റ് സംവിധാനങ്ങളും സജ്ജീകരിക്കുന്നതിനായുള്ള പദ്ധതികള്‍ ആരംഭിച്ചതായും മുഖ്യമന്ത്രി പറഞ്ഞു. ഇതിന്റെ ഭാഗമായി നൂറു ദിവസത്തിനുള്ളില്‍ 250 പുതിയ സ്കൂള്‍ കെട്ടിടങ്ങളുടെ പണി തുടങ്ങുമെന്നും മുഖ്യമന്ത്രി അറിയിച്ചു.
10 ഐ ടി ഐ ഉദ്‌ഘാടനം ചെയ്യും. സ്‌കൂളുകള്‍ തുറക്കാനാകാത്ത സാഹചര്യത്തില്‍ സംസ്ഥാന സര്‍ക്കാര്‍ ആരംഭിച്ച ഓണ്‍ലൈന്‍ ക്ലാസുകള്‍ക്ക് നേരെ വ്യാപക പ്രതിഷേധം ഉയര്‍ന്നിരുന്നു. ഓണ്‍ലൈന്‍ ക്ലാസുകള്‍ വന്‍ പരാജയമായിരുന്നുവെന്ന് പ്രതിപക്ഷ പാര്‍ട്ടികളും ആരോപണം ഉയര്‍ത്തിയിരുന്നു. ഇതിന്റെയെല്ലാം പോരായ്മകള്‍ നികത്താനാണ് സര്‍ക്കാരിന്റെ തീരുമാനം.
