കോട്ടയം: പട്ടികവര്ഗ വികസന വകുപ്പിനു കീഴില് പ്രവര്ത്തിച്ചുവരുന്ന മോഡല് റസിഡന്ഷ്യല് സ്കൂളില് അഞ്ചാം ക്ലാസിലേക്കുള്ള പ്രവേശനത്തിനും അതോടൊപ്പം പൂക്കോട്, ഇടുക്കി മോഡല് റസിഡന്ഷ്യല് സ്കൂളില് ആറാം ക്ലാസിലേക്കുള്ള പ്രവേശനത്തിനും അപേക്ഷ ക്ഷണിച്ചു. അഞ്ചാം ക്ലാസിലേക്ക് പട്ടികജാതി വിദ്യാര്ഥികള്ക്കും കൂടാതെ മറ്റു സമുദായത്തിലുള്ള വിദ്യാര്ഥികള്ക്കും പ്രവേശനത്തിനുള്ള അപേക്ഷ സമര്പിക്കാവുന്നതാണ്. കുടുംബ വാര്ഷിക വരുമാനം ഒരു ലക്ഷം രൂപയില് കൂടാത്തവരും കോട്ടയം ജില്ലയിലെ സ്ഥിര താമസക്കാരുമാകണം. പ്രവേശന പരീക്ഷയുടെ അടിസ്ഥാനത്തിലാണ് യോഗ്യരായ വിദ്യാര്ഥികളെ തെരഞ്ഞടുക്കുന്നത്. പ്രാക്തന ഗോത്ര വര്ഗ വിദ്യാര്ഥികള്ക്ക് പരീക്ഷയുടെ ആവശ്യമില്ല. നിര്ദിഷ്ട മാതൃകയില് ഉണ്ടാക്കിയ അപേക്ഷകളോടൊപ്പം ജാതി, വരുമാന സര്ട്ടിഫിക്കറ്റുകള്, ജനന തീയതി, പഠിക്കുന്ന ക്ലാസ് എന്നിവ രേഖപ്പെടുത്തി ഫോട്ടോ പതിച്ച് സ്ഥാപനമേധാവി സാക്ഷ്യപ്പെടുത്തിയ സര്ട്ടിഫിക്കറ്റ് എന്നിവ അപേക്ഷയോടൊപ്പം നല്കണം.
പട്ടികജാതി വിഭാഗക്കാര് ജില്ലാ പട്ടികജാതി വികസന ഓഫീസിലും പട്ടികവര്ഗ വിഭാഗക്കാരും മറ്റു സമുദായത്തിലുള്ളവരും കാഞ്ഞിരപ്പള്ളി ഐ റ്റി ഡി പി ഓഫീസിലോ, വൈക്കം, പുഞ്ചവയല്, മേലുകാവ് ട്രൈബല് എക്സ്റ്റന്ഷന് ഓഫീസിലോ അപേക്ഷ സമര്പിക്കണം. അപേക്ഷ നല്കാനുള്ള അവസാന തീയതി ഫെബ്രുവരി 28. അപേക്ഷ കാഞ്ഞിരപ്പള്ളി ഐ റ്റി ഡി പി ഓഫീസ്, മേലുകാവ്, പുഞ്ചവയല്, വൈക്കം ട്രൈബല് എക്സ്റ്റന്ഷന് ഓഫീസുകള്, ജില്ലാ/താലൂക്ക് പട്ടികജാതി വികസന ഓഫീസുകള്, ഏറ്റുമാനൂര് മോഡല് റസിഡന്ഷ്യല് സ്കൂള് എന്നിവിടങ്ങളില് ലഭിക്കും. മാര്ച്ച് 12നാണ് പ്രവേശന പരീക്ഷ.
