ബെംഗളൂരു: ബിജെപിക്ക് അനുകൂലമായി വോട്ട് വിഭജനം നടക്കാതിരിക്കാന് മത്സരിക്കരുതെന്ന് ബിജെപി ഇതരപാര്ട്ടികള് ആവശ്യപ്പെട്ടതായി കര്ണാടക എസ്ഡിപിഐ പ്രസിഡന്റ് മജീദ് കൊഡ്ലിപേട്ടെ പറഞ്ഞു. പ്രവീണ് നെട്ടാരു വധക്കേസിലെ പ്രതിയായ ഷാഫി ബെല്ലാരെയെ മത്സരിപ്പിക്കുന്നത് രാഷ്ട്രീയ പകപോക്കലിനെതിരായ പോരാട്ടമാണെന്നും മജീദ് പറഞ്ഞു. ബിജെപിക്ക് അനുകൂലമായി വോട്ട് വിഭജനം നടക്കാതിരിക്കാന് മത്സരിക്കരുതെന്ന് ബിജെപിയിതര പാര്ട്ടികള് തങ്ങളോട് ആവശ്യപ്പെട്ടു.
എന്നാല് കോണ്ഗ്രസ് എസ്ഡിപിഐ വോട്ട് മൊത്തമായി കൊണ്ടുപോയി ചില്ലറയായി ബിജെപിക്ക് വിറ്റു. ഇത്തവണ ഒരു പാര്ട്ടിയുമായും നീക്കുപോക്കിനില്ല. പോപ്പുലര് ഫ്രണ്ട് നിരോധനം പാര്ട്ടിയുടെ തെരഞ്ഞെടുപ്പ് പ്രകടനത്തെ ബാധിക്കില്ലെന്നും മജീദ് പറഞ്ഞു. മതധ്രുവീകരണം ശക്തമായ കര്ണാടക നിയമസഭാ തെരഞ്ഞെടുപ്പില് കോണ്ഗ്രസ് എസ്ഡിപിഐ അടക്കമുള്ള പാര്ട്ടികളോട് അകലം പാലിക്കുമ്പഴാണ് കര്ണാടക എസ്ഡിപിഐ പ്രസിഡന്റിന്റെ പുതിയ വെളിപ്പെടുത്തല്.
ബിജെപി വിരുദ്ധ പക്ഷം പിടിക്കുന്ന പാര്ട്ടികളെ ഒന്നിച്ച് നിര്ത്തണമെന്ന് ഇത്തവണയും ആവശ്യമുയര്ന്നിട്ടും കോണ്ഗ്രസ് കേട്ടില്ലെന്ന് എസ്ഡിപിഐ ആരോപിക്കുന്നു. ഇത്തവണ 100 സീറ്റുകളിലാണ് എസ്ഡിപിഐ മത്സരിക്കുക. യുവമോര്ച്ചാ നേതാവ് പ്രവീണ് നെട്ടാരുവിനെ വധിച്ച കേസിലെ പ്രതിയായ എസ്ഡിപിഐ സംസ്ഥാന സെക്രട്ടറി ഷാഫി ബെല്ലാരെയെ പുത്തൂരില് നിന്ന് മത്സരിപ്പിക്കുന്നത് പാര്ട്ടി പ്രവര്ത്തകരുടെ വികാരം മാനിച്ചാണെന്നും മജീദ് വ്യക്തമാക്കി. പോപ്പുലര് ഫ്രണ്ട് നിരോധനം പാര്ട്ടിയുടെ തെരഞ്ഞെടുപ്പ് പ്രകടനത്തെ ഒരു തരത്തിലും ബാധിക്കില്ലെന്നാണ് എസ്ഡിപിഐ പറയുന്നത്.
