മലപ്പുറം : തദ്ദേശ തിരഞ്ഞെടുപ്പിന്റെ വോട്ടെണ്ണലിന്റെ പശ്ചാത്തലത്തില് മലപ്പുറം ജില്ലയില് നിരോധനാജ്ഞ പ്രഖ്യാപിച്ചു. ഡിസംബര് 22 വരെയാണ് കലക്ടര് നിരോധനാജ്ഞ പ്രഖ്യാപിച്ചിരിക്കുന്നത്. രാത്രി എട്ട് മുതല് രാവിലെ എട്ട് വരെയാണ് നിരോധനാജ്ഞ. ഈ സമയങ്ങളില് വിവാഹം, മരണം എന്നീ ചടങ്ങുകള് ഒഴികെ പ്രകടനം, ഘോഷയാത്ര, സമ്മേളനം മുതലായ ചടങ്ങുകള് അനുവദിക്കില്ല.
രാത്രി എട്ടിനു ശേഷം ആരാധനാലയങ്ങള് ഒഴികെയുള്ള സ്ഥലങ്ങളിലും സ്ഥാപനങ്ങളിലും മൈക്ക് ഉപയോഗിക്കുവാന് പാടില്ല. തുറന്ന വാഹനങ്ങള് അനുവദനീയമായ ശബ്ദത്തില് കൂടുതല് ഉള്ള ഉച്ചഭാഷിണി പകല് സമയത്തും ഉപയോഗിക്കുവാന് പാടില്ല. പകല്സമയത്തെ വിജയാഹ്ലാദ പരിപാടികളിലും സമ്മേളനങ്ങളിലും മറ്റും 100ല് കൂടുതല് ആളുകള് പങ്കെടുക്കുവാന് പാടില്ല. ഈ പരിപാടികളില് സര്ക്കാര് നിര്ദേശിച്ച കൊവിഡ് 19 മാനദണ്ഡങ്ങള് പാലിക്കണം.
10 വയസിന് താഴെയുള്ള കുട്ടികളും 65 വയസിന് മുകളിലുള്ള സ്ഥാനാര്ത്ഥികള് ഒഴികെയുള്ള വ്യക്തികളും വിജയാഹ്ലാദ പരിപാടികളിലും സമ്മേളനങ്ങളിലും മറ്റും പങ്കെടുക്കുവാന് പാടില്ല. കോഴിക്കോട് ജില്ലയിലെ അഞ്ചിടങ്ങളിലും നിരോധനാജ്ഞ പ്രഖ്യാപിച്ചിട്ടുണ്ട്. വടകര, കുറ്റ്യാടി, നാദാപുരം, പേരാമ്ബ്ര, വളയം എന്നിവിടങ്ങളില് സംഘര്ഷ സാധ്യത കണക്കിലെടുത്താണ് ചൊവ്വാഴ്ച വൈകുന്നേരം ആറുമുതല് മറ്റന്നാള് വൈകുന്നേരം ആറുവരെ നിരോധനാജ്ഞ.
