ആലപ്പുഴ : വ്യാജ അഭിഭാഷക സെസി സേവ്യറിന്റെ അറസ്റ്റ് തടയണമെന്ന ആവശ്യം ഹൈക്കോടതി തള്ളി. മുന്കൂര് ജാമ്യാപേക്ഷയില് വിശദമായി വാദം കേള്ക്കണമെന്ന് കോടതി അറിയിച്ചു. ജാമ്യാപേക്ഷ ഈ മാസം 30ന് വീണ്ടും പരിഗണിക്കും. ഐ.പി.സി. 417(വഞ്ചന), 419, 420(ആള്മാറാട്ടം) എന്നിവയാണ് സെസിക്കെതിരെ ചുമത്തിയിരുന്നത്. എല്.എല്.ബി പാസാകാത്ത സെസി സേവ്യര് തിരുവനന്തപുരം സ്വദേശിനി സംഗീത എന്ന അഭിഭാഷകയുടെ റോള് നമ്പര് ഉപയോഗിച്ചാണ് പ്രാക്ടീസ് ചെയ്തിരുന്നത്.
2019ലാണ് ആലപ്പുഴ ബാര് അസോസിയേഷനില് സെസി അംഗത്വമെടുക്കുന്നത്. പിന്നീട് അസോസിയേഷന് ലൈബ്രേറിയനായും തെരഞ്ഞെടുക്കപ്പെട്ടു. സെസിയുടെ തട്ടിപ്പ് കണ്ടെത്തിയ ബാര് അസോസിയേഷന് ഇവരെ പുറത്താക്കി. പോലീസില് പരാതി നല്കിയതോടെ സെസി ഒളിവില് പോയി. പിന്നീട് ആലപ്പുഴ സി.ജെ.എം കോടതിയില് കീഴടങ്ങാന് എത്തിയെങ്കിലും ജാമ്യമില്ലാ വകുപ്പുകള് ചുമത്തിയിട്ടുണ്ടെന്ന് അറിഞ്ഞതോടെ മുങ്ങി. തുടര്ന്നാണ് ഹൈക്കോടതിയില് മുന്കൂര് ജാമ്യാപേക്ഷ നല്കിയത്.
