വടശേരിക്കര: ടൗണിലെ ഗതാഗതക്കുരുക്ക് ദിനംപ്രതി രൂക്ഷമാകുന്നത് യാത്രക്കാരെയും പ്രദേശവാസികളെയും വലയ്ക്കുന്നു. സ്വകാര്യ, കെ.എസ്.ആർ.ടി.സി ബസുകൾ റോഡിൽത്തന്നെ നിർത്തി ആളുകളെ കയറ്റുകയും ഇറക്കുകയും ചെയ്യുന്നതാണ് പ്രധാനമായും ഗതാഗത തടസ്സത്തിന് കാരണമാകുന്നത്. പ്രധാന റോഡിൽ ബസുകൾ തോന്നിയപോലെ നിർത്തിയിടുമ്പോൾ പിന്നാലെ എത്തുന്ന മറ്റു വാഹനങ്ങൾക്ക് മറികടന്നു പോകാൻ സാധിക്കാത്ത സ്ഥിതിയാണ്. ഇതിനുപുറമേ, ശബരിമല തീർഥാടന കാലം ആരംഭിക്കുന്നതോടെ തീർഥാടകരുടെ വാഹനങ്ങൾകൂടി എത്തുന്നതോടെ ടൗണിലെ ഗതാഗതം പൂർണമായും സ്തംഭിക്കുന്ന അവസ്ഥയിലാകും.
മണിക്കൂറുകളോളമാണ് പലപ്പോഴും വാഹനങ്ങൾ കുരുക്കിൽപ്പെടുന്നത്. അടിയന്തരമായി ബസുകൾ നിർത്തിയിടാൻ സൗകര്യപ്രദമായ ഒരു ബസ് സ്റ്റാൻഡ് നിർമിക്കുക എന്നതു മാത്രമാണ് ഈ പ്രശ്നത്തിനുള്ള ശാശ്വത പരിഹാരം. അധികൃതർ എത്രയും വേഗം ഇടപെട്ട് അനുയോജ്യമായ സ്ഥലം കണ്ടെത്തി ബസ് സ്റ്റാൻഡ് നിർമാണത്തിനുള്ള നടപടികൾ സ്വീകരിക്കണമെന്നാണ് നാട്ടുകാരുടെയും യാത്രക്കാരുടെയും ആവശ്യം.
