തിരുവനന്തപുരം: ഉന്നതവിദ്യാഭ്യാസ രംഗത്ത് അപമാനകരമായ സംഭവങ്ങള് റിപ്പോര്ട്ട് ചെയ്യുന്നുവെന്ന് പ്രതിപക്ഷ നേതാവ് വി.ഡി.സതീശന്. എസ്.എഫ്.ഐ സംസ്ഥാന സെക്രട്ടറിയുടെ നേതൃത്വത്തിലാണ് വ്യാജരേഖയുണ്ടാക്കിയത്. മഹാരാജാസ് കോളേജിന്റെ പേരില് വ്യാജരേഖയുണ്ടാക്കി അധ്യാപക ജോലിക്ക് ശ്രമിച്ച കേസില് എത്രയും പെട്ടെന്ന് പ്രതിയെ അറസ്റ്റ് ചെയ്ത് ജയിലില് അടയ്ക്കണം. സംവരണം അട്ടിമറിച്ച് പിഎച്ച്ഡിക്ക് ഇതേ വിദ്യാര്ത്ഥിനിക്ക് അവസരം നല്കി. 2020ല് കാലടി സര്വ്വകലാശാലയിലെ എസ് സി എസ് ടി സെല് ഇത് റിപ്പോര്ട്ട് ചെയ്തിട്ടും, ഉന്നത ഇടപെലില്, റിപ്പോര്ട്ട് പൂഴ്ത്തി. എസ്എഫ്ഐ നേതാക്കളുടേയും മുതിര്ന്ന സിപിഎം നേതാക്കളുടേയും സഹായം ഇതിന് കിട്ടിയിട്ടുണ്ടെന്നും അദ്ദേഹം ആരോപിച്ചു
വ്യാജരേഖയുണ്ടാക്കിയവരെയെല്ലാം അടിയന്തരമായി അറസ്റ്റ് ചെയ്യണം. ഗണ്പോയിന്റില് നിര്ത്തിയാണ് കോളജ് പ്രിന്സിപ്പലിനെ കൊണ്ട് എസ്.എഫ്.ഐ സംസ്ഥാന സെക്രട്ടറിക്കെതിരെയുള്ള പരാമര്ശം തിരുത്തിച്ചത്. പാര്ട്ടിയും ഭരണ നേതൃത്വവും ഈ ക്രിമിനലുകളെ വെച്ചു പൊറുപ്പിക്കുകയാണ്. ഇവരാണല്ലോ നേതാക്കള് എന്നോര്ത്ത് പേടിയാകുന്നു. ഇരട്ട നീതിയാണ് കേരളത്തില് നടക്കുന്നതെന്നും വി.ഡി.സതീശന് പറഞ്ഞു.
