സംവിധായകൻ കമലിന്റെ അസിസ്റ്റന്റായി സിനിമയിലേക്ക് എത്തുകയും പിന്നീട് ചെറുതും വലുതുമായ നിരവധി വേഷങ്ങൾ ചെയ്ത് പ്രേക്ഷകരുടെ മനസ്സിൽ ഇടം നേടിയ നടനാണ് ഷൈൻ ടോം ചാക്കോ. ഇപ്പോഴത്തെ ഏറ്റവും മികച്ച പത്ത് സംവിധായകർ ആരൊക്കെയാണ് എന്ന ചോദ്യത്തിന് മറുപടി പറയുകയാണ് താരം. ഡ്രീം സ്ക്രീൻ എന്റർടൈയ്മെന്റിന് നൽകിയ അഭിമുഖത്തിലായിരുന്നു പ്രതികരണം. പത്ത് സംവിധായകരുടെ പേരുകൾ മാത്രമായി പറയാൻ കഴിയില്ലെന്നും മികച്ച സംവിധായകർ ഒരുപാടുണ്ടെന്നും താരം പറയുന്നു. മഞ്ഞുമ്മൽ ബോയ്സിന്റെ സംവിധായകൻ ചിദംബരം അതിൽ ഒരാളാണെന്നും ഷൈൻ പറഞ്ഞു.
താൻ അഭിനയിച്ച സിനിമകളിൽ ഏതൊക്കെ കഥാപാത്രങ്ങൾ മികച്ചതായി തോന്നിയിട്ടുണ്ടോ ആ സിനിമകളുടെ സംവിധായകരൊക്കെ മികച്ചവരാണെന്നും താരം പറഞ്ഞു. അൻവർ റഷീദ്, ആഷിക് അബു, അമൽ, സമീർ, രാജേഷ് പിള്ള, അനുരാജ്, രാജീവേട്ടൻ ഉൾപ്പെടെയുള്ളവർ മികച്ച സംവിധായകരാണ്. എന്നാൽ തന്നെ ഏറ്റവും കൂടുതൽ ആശ്ചര്യപ്പെടുത്തിയ സംവിധായകൻ ഖാലിദ് റഹ്‌മാൻ ആണെന്നാണ് ഷൈൻ ടോം ചാക്കോ പറയുന്നത്. ഖാലിദ് റഹ്‌മാനെ ആദ്യം കാണുമ്പോൾ രാജീവേട്ടന്റെ കൂടെ അസിസ്റ്റന്റ് ഡയറക്‌ടറായിരുന്നു എന്നും ഷൈൻ പറഞ്ഞു. തല്ലുമാല, ലവ്, ഉണ്ട, അനുരാഗ കരിക്കിൻ വെള്ളം തുടങ്ങിയ സൂപ്പർഹിറ്റ്‌ സിനിമകളുടെ സംവിധായാകനാണ് ഖാലിദ് റഹ്‌മാൻ.
