ലണ്ടൻ: ബ്രിട്ടീഷ് രാഷ്ട്രീയത്തിൽ മലയാളി കരുത്ത് തെളിയിച്ച് കോന്നി സ്വദേശി ഷിനു യോഹന്നാൻ ലേബർ പാർട്ടി സ്ഥാനാർത്ഥിയായി മത്സരിക്കുന്നു. ഗേറ്റ്സ്ഹെഡ് കൗൺസിലിലെ (Gateshead Council) ലോബ്ലി ഹിൽ ആൻഡ് ബെൻഷാം (Lobley Hill and Bensham) വാർഡിൽ നിന്നാണ് എഞ്ചിനീയറായ ഷിനു യോഹന്നാൻ ജനവിധി തേടുന്നത്. മെയ് 7 വ്യാഴാഴ്ചയാണ് വോട്ടെടുപ്പ് നടക്കുക. വടക്കൻ ഇംഗ്ലണ്ടിലെ പ്രധാന കൗൺസിലുകളിൽ ഒന്നായ ഗേറ്റ്സ്ഹെഡിൽ ലേബർ പാർട്ടിയുടെ പ്രതിനിധിയായി ഒരു മലയാളി എത്തുന്നു എന്നത് പ്രവാസി സമൂഹത്തിന് വലിയ അഭിമാനമാണ് നൽകുന്നത്. ‘Renew Gateshead’ എന്ന മുദ്രാവാക്യമുയർത്തിയാണ് ഷിനു തന്റെ തെരഞ്ഞെടുപ്പ് പ്രചാരണം നയിക്കുന്നത്.
പ്രൊഫഷണൽ രംഗത്തെ മികവിനൊപ്പം രാഷ്ട്രീയത്തിലും സജീവമാകുന്ന മലയാളി യുവത്വത്തിന്റെ പ്രതിനിധിയാണ് ഷിനു. ബ്രിട്ടീഷ് മലയാളികൾക്കിടയിലും പ്രാദേശിക സമൂഹത്തിനിടയിലും വലിയ പിന്തുണയാണ് ഷിനു യോഹന്നാന് ലഭിച്ചുകൊണ്ടിരിക്കുന്നത്. ലേബർ പാർട്ടിയുടെ കോട്ടയായ ഇവിടെ ഷിനുവിന്റെ വിജയം സുനിശ്ചിതമാണെന്നാണ് പ്രാഥമിക വിലയിരുത്തലുകൾ.
