മുംബൈ : ആഡംബര കപ്പലിൽ ലഹരി പാർട്ടി നടത്തിയ കേസിൽ പരിപാടിയുടെ സംഘാടകർക്കെതിരെ നീക്കവുമായി എൻസിബി. ദില്ലി ആസ്ഥാനമായി പ്രവർത്തിക്കുന്ന നമാസ് ക്രൈ എന്ന സ്ഥാപനമാണ് കപ്പൽ യാത്രയിലെ പരിപാടികൾ സംഘടിപ്പിച്ചത്.
രണ്ട് അഡീഷണൽ ഡയറക്ടർമാരടക്കം ഈ സ്ഥാപനത്തിലെ നാല് ജീവനക്കാരെ എൻസിബി അറസ്റ്റ് ചെയ്തു. ഒളിവിലുള്ള മൂന്ന് ജീവനക്കാർക്കായി അന്വേഷണവും തുടങ്ങി. ഫാഷൻ ടീവിക്കൊപ്പം ചേർന്നാണ് ഈ സ്ഥാപനം കപ്പൽ യാത്ര സംഘടിപ്പിച്ചത്. അതിഥികളെ ക്ഷണിച്ചതും ടിക്കറ്റുകളുടെ വിൽപ്പന നടത്തിയതും ഈ സ്ഥാപനമാണെന്ന് തെളിഞ്ഞിട്ടുണ്ട്.
അതേസമയം കേസിൽ അറസ്റ്റിലായ ആര്യൻഖാന്റെ ചോദ്യം ചെയ്യൽ തുടരുകയാണ്. അന്വേഷണത്തോട് ആര്യൻ പൂർണമായി സഹകരിക്കുന്നുണ്ടെന്ന് എൻസിബി പറയുന്നു. എൻസിബി കസ്റ്റഡി നാളെ അവസാനിക്കും. കേസിൽ ഇതുവരെ 16 പേർ അറസ്റ്റിലായെന്ന് എൻ.സി.ബി വ്യക്തമാക്കി.
