ഭോപ്പാല്‍ : മാഫിയ സംഘങ്ങള്‍ക്ക് അന്ത്യശാസനവുമായി മധ്യപ്രദേശ് മുഖ്യമന്ത്രി ശിവരാജ് സിംഗ് ചൗഹാന്‍. താന്‍ അപകടകരമായ മാനസികാവസ്ഥയിലാണെന്നും ഗൂണ്ടകളും മാഫിയകളും മര്യാദക്കാരാകണമെന്നും അതിനു തയ്യാറല്ലെങ്കില്‍ സംസ്ഥാനം വിട്ടുപോകണമെന്നും മുഖ്യമന്ത്രി പറഞ്ഞു.
ഇനിയും ജനങ്ങളെ ദ്രോഹിച്ചാല്‍ 10 അടി താഴ്ചയില്‍ അടക്കം ചെയ്യാന്‍ മടിക്കില്ലെന്നും മുഖ്യമന്ത്രി മുന്നറിയിപ്പ് നല്‍കി. മയക്കുമരുന്ന് മാഫിയ, ഭൂമാഫിയ, ചിട്ടി മാഫിയ, ഗുണ്ടകള്‍ എന്നിവരെ വെറുതേ വിടില്ല. സംസ്ഥാനത്തെ മയക്കുമരുന്ന് പ്രശ്നം പരിഹരിക്കാന്‍ കേന്ദ്ര വകുപ്പുകളുമായി സംസ്ഥാന സര്‍ക്കാര്‍ ചര്‍ച്ച നടത്തുമെന്നും ഹൊഷാങ്ബാദിലെ ഒരു ചടങ്ങില്‍ മുഖ്യമന്ത്രി പറഞ്ഞു.
ജനങ്ങള്‍ക്ക് സ്വസ്ഥതയും സമാധാനവുമാണ് വേണ്ടത്. അതിനാണ് ഭരണാധികാരികള്‍ ശ്രമിക്കുകയെന്നും ചൗഹാന്‍. സംസ്ഥാനത്തെ ബിജെപി സര്‍ക്കാര്‍ നിയമം അനുസരിക്കുന്ന പൗരന്മാര്‍ക്ക് പൂക്കളേക്കാള്‍ മൃദുവാണെന്നും തിന്മയുള്ളവര്‍ക്ക് ഇടിമിന്നലിനെക്കാള്‍ മാരകമാണെന്നും മുഖ്യമന്ത്രി നേരത്തെ പറഞ്ഞിരുന്നു.
