മല്ലപ്പള്ളി : സ്വകാര്യ ബസ് സ്റ്റാൻഡിലെ പ്രവേശന കവാടത്തിൽ തകര്ന്ന കോൺക്രീറ്റ് സ്ലാബ് പുനസ്ഥാപിക്കണമെന്ന ആവശ്യം ശക്തമാകുന്നു. പ്രവേശന കവാടത്തിലുള്ള ഓടയുടെ മുകളിൽ സ്ഥാപിച്ച സ്ലാബുകളിൽ ഒന്നിന്റെ വശങ്ങള് തകര്ന്നിട്ട് കാലങ്ങളേറെയായി. ഒരേയൊരു പ്രവേശന കവാടം മാത്രമുള്ള മല്ലപ്പള്ളി ബസ് സ്റ്റാന്റില് തകര്ന്ന സ്ലാബിനുമുകളിലൂടെയാണ് ബസുകള് കടന്നുപോകുന്നത്. ബസുകളുടെ ഭാരം താങ്ങാനാവാതെ ഓടയ്ക്ക് മുകളില് സ്ഥാപിച്ച സ്ലാബ് രണ്ടായി ഒടിഞ്ഞാല് വലിയ അപകടത്തിന് സാധ്യതയേറെയാണ്.
താലൂക്ക് കേന്ദ്രമായ മല്ലപ്പള്ളിയിൽ ദിവസവും ആയിരക്കണക്കിന് ആളുകളാണ് വന്നുപോകുന്നത്. സ്വകാര്യ ബസ്സ്റ്റാൻഡിൽ തന്നെ കെ.എസ്.ആര്.ടി.സി. ബസുകളും വന്നുപോകുന്നതിനാൽ പ്രവർത്തി ദിവസങ്ങളിൽ ഇവിടെ വലിയ തിരക്ക് അനുഭവപ്പെടാറുണ്ട്. സ്ലാബിനുള്ളില് നിന്നും കമ്പികള് പുറത്തേക്ക് തള്ളിനില്ക്കുന്നുണ്ട്. ഇതും യാത്രക്കാര്ക്കും ബസുകള്ക്കും ഭീഷണിയാണ്. അപകട സാധ്യത മുന്നില് കണ്ട് സ്ലാബ് പുനസ്ഥാപിക്കാന് നടപടി സ്വീകരിക്കണമെന്ന് യാത്രക്കാരും വ്യാപാരികളും അധികൃതരോട് പല തവണ ആവശ്യപ്പെട്ടിരുന്നു. എന്നിട്ടും നടപടിയുണ്ടായില്ല.
