കോഴിക്കോട്: കണ്ണില്‍ മണലെറിഞ്ഞ് പെട്രോള്‍ പമ്പ് ജീവനക്കാരനില്‍ നിന്ന് പണം തട്ടിപ്പറിച്ചു. കോഴിക്കോട്ടെ , കണ്ണൂര്‍ റോഡിലെ പെട്രോള്‍ പമ്പില്‍ ബുധനാഴ്ച പുലര്‍ച്ചെയാണ് സംഭവം. ബൈക്കിലെത്തിയ രണ്ടംഗ സംഘം രാത്രി ഡ്യൂട്ടിയിലുണ്ടായിരുന്ന ജീവനക്കാരന്റെ കണ്ണില്‍ മണലെറിഞ്ഞാണ് കവര്‍ച്ച നടത്തിയത്. ജീവനക്കാരന്റെ ബാഗിലുണ്ടായിരുന്ന 32000 രൂപ തട്ടിപ്പറിച്ചു. ഇതിന്റെ സി.സി.ടി.വി ദൃശ്യങ്ങള്‍ പുറത്ത് വന്നിട്ടുണ്ട്.
എണ്ണയടിക്കാനെന്ന വ്യാജേനയാണ് രണ്ടംഗ സംഘം സംഘം ബൈക്കില്‍ എത്തിയത്. ബൈക്ക് ഓടിച്ചിരുന്നയാള്‍ വാഹനം ഓഫ് ആക്കിയിരുന്നില്ല. പുറകിലിരുന്ന ആള്‍ കസേരയില്‍ ഇരിക്കുകയായിരുന്ന ജീവനക്കാരന്റെ അടുത്തെത്തി കണ്ണില്‍ മണല്‍ എറിയുകയായിരുന്നു. പിന്നാലെ, കയ്യിലുണ്ടായിരുന്ന ബാഗ് തട്ടിപ്പറിച്ച്‌ ബൈക്കില്‍ കയറി രക്ഷപ്പെട്ടു. കസേരയെടുത്ത് യുവാവ് വാഹനത്തിന് നേരെ എറിഞ്ഞെങ്കിലും മോഷ്ടാക്കള്‍ രക്ഷപ്പെട്ടു. സംഭവവുമായി ബന്ധപ്പെട്ട് നടക്കാവ് പോലീസ് കേസെടുത്ത് അന്വേഷണം ആരംഭിച്ചു. ജീവനക്കാരനില്‍ നിന്ന് മൊഴി എടുക്കുകയും ചെയ്തിട്ടുണ്ട്.
