പത്തനംതിട്ട : സാമൂഹ്യ പ്രവർത്തക ഡോ. എം എസ് സുനിൽ ഭവനരഹിതരായ നിരാലംബർക്ക് പണിത് നൽകുന്ന 199 ാമത്തെ സ്നേഹഭവനം കൊടുമൺ ഇടത്തിട്ട തുണ്ടിയിൽ ശുഭക്കും മൂന്നു കുഞ്ഞുങ്ങൾക്കുമായി വിദേശ മലയാളിയായ പ്രിൻസ് കോരയുടെ സഹായത്താൽ നിര്‍മ്മിച്ചു നല്‍കി. പ്രിൻസ് കോരയുടെ അമ്മ തങ്കമ്മ ചെറിയാന്റെ എൺപതാം ജന്മദിന സമ്മാനമായാണ് വീട് നിർമ്മിച്ചു നൽകിയത്. വീടിന്റെ താക്കോൽ ദാനം കൊച്ചിൻ യൂണിവേഴ്സിറ്റി പ്രൊഫസർ തോമസ് ടി.യും ഡോ. എം എസ് സുനിലും ചേർന്ന് നിർവഹിച്ചു.
ആക്സിഡന്റിൽ ശരീരം തളർന്ന് അവശനിലയിൽ കഴിയുന്ന ഭർത്താവ് രാജേഷുമായി പോകാൻ ഇടമില്ലാതെ ചേച്ചിയുടെ വീടിന്റെ ഒരു മുറിയിൽ മൂന്നു കുട്ടികളുമായി കഴിയുകയായിരുന്നു ശുഭ. ഭർത്താവിന്റെ അവസ്ഥയും വീട്ടിലെ കഷ്ടപ്പാടും മൂന്നു കുട്ടികളുടെ ചിലവും എല്ലാം കൂടി ആയപ്പോൾ എന്തുചെയ്യണമെന്നറിയാത്ത അവസ്ഥയില്‍ ആയിരുന്നു ഇവര്‍. കുടുംബത്തിന്റെ അവസ്ഥ നേരിൽ കണ്ടു മനസ്സിലാക്കിയ സുനില്‍ ടീച്ചർ, പ്രിൻസ് കോരയുടെ സഹായത്താൽ രണ്ടു മുറികളും അടുക്കളയും ഹാളും സിറ്റൗട്ടും ശുചിമുറിയും അടങ്ങിയ 650 sq. ft വലിപ്പമുള്ള വീട് ഈസ്റ്റർ ദിനത്തിൽ നൽകുകയായിരുന്നു. ചടങ്ങിൽ ഡോ. ബിജി തോമസ്, കെ പി. ജയലാൽ, ഹരിത കൃഷ്ണൻ എന്നിവർ പങ്കെടുത്തു.
