കൂര്‍ക്കം വലി പലരും നേരിടുന്ന വലിയ പ്രശ്നമാണ്. കൂര്‍ക്കംവലിയ്ക്കുന്നവര്‍ സുഖമായി ഉറങ്ങും. എന്നാല്‍ ഒപ്പം ഒരേ മുറിയില്‍ കഴിയുന്നവരുടെ ഉറക്കവും കെടുത്തും. കൂര്‍ക്കം വലിയ്ക്ക് പല കാരണങ്ങളാണ് പറയപ്പെടുന്നത്‌. ഉറക്കത്തില്‍ ശ്വസനപ്രക്രിയ നടക്കുമ്പോള്‍ എന്തെങ്കിലും തടസങ്ങളുണ്ടായാലാണ് മുഖ്യമായും അത് കൂര്‍ക്കം വലിയുടെ സ്വഭാവം കാണിക്കുക. സുഖകരമല്ലാത്ത ഉറക്കത്തിന്‍റെ ലക്ഷണം തന്നെയാണ് കൂര്‍ക്കം വലി. സൈനസ് പ്രശ്നങ്ങള്‍, പ്രായം, ശരീര ഭാരം, ആരോഗ്യ സ്ഥിതി എന്നിവയെല്ലാം കൂര്‍ക്കംവലിക്ക് കാരണമാകാറുണ്ട്. എന്നാല്‍ കുര്‍ക്കംവലി മാറ്റിയെടുക്കാന്‍ സാധിക്കും. ചില കാര്യങ്ങള്‍ ശ്രദ്ധിച്ചാല്‍ മതി.
വ്യായാമം ചെയ്യുന്നതില്‍ ഒട്ടും കുറവ് വരുത്തേണ്ട. ഇതു ശരീരഭാരം കുറയ്ക്കാന്‍ സഹായിക്കും. കഴുത്തിലെ പേശികള്‍ക്ക് ആയാസം കിട്ടുംവിധം പതിവായി വ്യായാമം ചെയ്യുക. ഇത് കൂര്‍ക്കംവലി തടയാന്‍ സഹായിക്കും. ശരീര ഭാരം കുറയ്ക്കുന്നത് കൂര്‍ക്കംവലി നിയന്ത്രിക്കാന്‍ സഹായിക്കും. വണ്ണം കൂടുന്നത് പ്രത്യേകിച്ചും കഴുത്തിനു ചുറ്റും വണ്ണം വയ്ക്കുന്നത് ചിലപ്പോള്‍ കൂര്‍ക്കംവലിക്ക് കാരണമാകും. അതിനാല്‍ ശരീര ഭാരം കുറയ്ക്കാന്‍ ശ്രമിക്കുക.
രാത്രി ഭക്ഷണം ഏറെ പ്രധാനമാണ്. അത് കഴിയ്ക്കുന്ന സമയവും എത്രമാത്രം കഴിയ്ക്കുന്നുവെന്നതും പ്രധാനമാണ്. രാത്രിയില്‍ ഉറങ്ങുന്നതിന് രണ്ടു മണിക്കൂര്‍ മുന്‍പ് ആഹാരം കഴിക്കണം. ഹെവി ഫുഡ്‌ കഴിച്ച ശേഷം ഉറങ്ങുമ്പോള്‍ ചിലപ്പോള്‍ കൂര്‍ക്കംവലി ഉണ്ടാകാം.ഉറങ്ങുന്നതിനു മുന്‍പ് അമിതമായി മദ്യപിക്കുന്നത് കൂര്‍ക്കംവലിക്കു കാരണമാകുന്നുണ്ട്. മദ്യം തൊണ്ടയിലെ മസിലുകളെ അയയ്ക്കുകയും ഉറക്കം കൂട്ടുകയും ചെയ്യും.
