തിരുവനന്തപുരം : ഭരണപരമായ മാറ്റങ്ങൾ കൊണ്ടുവരുമ്പോൾ ഉയരുന്ന വിമർശനങ്ങളെ അതീവ പരിഹാസത്തോടെ തള്ളി വി.ഡി. സതീശൻ. വികസനത്തിനും നയപരമായ മാറ്റങ്ങൾക്കും തടസ്സം നിൽക്കുന്നവർക്ക് വലിയ അസ്വസ്ഥതയാണെന്നും, അത് താൻ നന്നായി ആസ്വദിക്കുന്നുണ്ടെന്നും അദ്ദേഹം തുറന്നടിച്ചു. തിരുവനന്തപുരത്ത് നടന്ന ചടങ്ങിലായിരുന്നു പ്രതിപക്ഷ നേതാവിനെ ലക്ഷ്യം വെച്ചുള്ള സതീശന്റെ ശക്തമായ പ്രത്യാക്രമണം.താൻ സ്വകാര്യവത്കരണത്തിനായി വന്നയാളാണെന്ന് ചിലർ ബോധപൂർവ്വം വ്യാജപ്രചാരണം നടത്തുകയാണെന്ന് സതീശൻ പറഞ്ഞു. പരമ്പരാഗതമായ ശൈലികൾ മാറ്റിപ്പിടിക്കുമ്പോൾ ചിലർക്ക് ബുദ്ധിമുട്ടും ചൊറിച്ചിലും ഉണ്ടാകുന്നത് സ്വാഭാവികമാണ്.
എന്നാൽ ഇത്തരം വിമർശനങ്ങൾ തന്നെ ബാധിക്കുന്നില്ലെന്നും, ഇതിനെ താൻ ആസ്വദിക്കുകയാണെന്നുമാണ് അദ്ദേഹത്തിന്റെ നിലപാട്. ഭരണത്തിന്റെ ശൈലിയിൽ മാറ്റങ്ങൾ കൊണ്ടുവരുന്നത് നാടിന്റെ നന്മയ്ക്കു വേണ്ടിയാണെന്നും അദ്ദേഹം കൂട്ടിച്ചേർത്തു.ഭരണപരമായ തീരുമാനങ്ങളിൽ തെറ്റ് സംഭവിച്ചാൽ അത് തിരുത്താൻ മടിക്കില്ലെന്ന് സതീശൻ വ്യക്തമാക്കി. എന്നാൽ, ഇത്തരം തിരുത്തലുകളെ മാധ്യമങ്ങൾ ‘യൂ-ടേൺ’ എന്ന് ചിത്രീകരിക്കുന്നത് ശരിയായ പ്രവണതയല്ല. തെറ്റുകൾ മനസ്സിലാക്കി തിരുത്തുന്നത് ഭരണാധികാരിയുടെ ഉത്തരവാദിത്തമാണെന്നും, അതിനെ തെറ്റായി വ്യാഖ്യാനിക്കുന്നത് ഒഴിവാക്കണമെന്നും അദ്ദേഹം ആവശ്യപ്പെട്ടു. നാടിന്റെ വികസനത്തിനായി പുതിയ മാറ്റങ്ങൾ ഉൾക്കൊണ്ട് മുന്നോട്ട് പോകുമെന്നും അദ്ദേഹം ആവർത്തിച്ചു.വിമർശനങ്ങളെ ഭയന്നല്ല, മറിച്ച് വികസന ലക്ഷ്യത്തോടെയാണ് സർക്കാർ മുന്നോട്ട് പോകുന്നതെന്ന് വ്യക്തമാക്കുകയാണ് സതീശൻ.
