തിരുവനന്തപുരം : സ്പ്രിന്‍ക്ലര്‍ ഇടപാടില്‍ നിയമ വിരുദ്ധമായാണ് കരാര്‍ ഒപ്പിട്ടതെന്നു കണ്ടെത്തിയ റിപ്പോര്‍ട്ടില്‍ അന്നത്തെ ഐടി പ്രിന്‍സിപ്പല്‍ സെക്രട്ടറി എം.ശിവശങ്കറിനെ വെള്ള പൂശിയത് വിചിത്രമാണെന്ന് കോണ്‍ഗ്രസ് നേതാവ് രമേശ് ചെന്നിത്തല. സ്പ്രിന്‍ക്ലര്‍ കരാര്‍ സംബന്ധിച്ച്‌ പ്രതിപക്ഷം ഉയര്‍ത്തിയ ആരോപണങ്ങള്‍ ശരിവെയ്ക്കുന്നതാണ് സര്‍ക്കാരിന്റെ രണ്ടാം വിദഗ്ധ സമിതിയുടെ റിപ്പോര്‍ട്ടെന്നും അദ്ദേഹം പറഞ്ഞു.
ഈ റിപ്പോര്‍ട്ട് അംഗീകരിക്കാനാകില്ലെന്നും കരാര്‍ സംബന്ധിച്ച്‌ ജുഡീഷ്യല്‍ അന്വേഷണം വേണമെന്നും രമേശ് ചെന്നിത്തല പറഞ്ഞു. കോവിഡ് വിവരവിശകലനത്തിനു സ്പ്രിന്‍ക്ലര്‍ കമ്പിനിയെ നിയമിക്കുന്നതായി ഐടി വകുപ്പിന്റെ ചുമതലയുള്ള മുഖ്യമന്ത്രി പിണറായി വിജയനെപ്പോലും അറിയിച്ചിരുന്നില്ലെന്നും സ്വകാര്യ വിവരങ്ങള്‍ അപ്‌ലോഡ് ചെയ്യുന്നതിനു മുന്‍പ് ഡേറ്റ സുരക്ഷ ഉറപ്പു വരുത്തിയില്ലെന്നും കരാറിനെക്കുറിച്ച്‌ അന്വേഷിക്കാന്‍ സര്‍ക്കാര്‍ നിയോഗിച്ച രണ്ടാം വിദഗ്ധ സമിതിയുടെ റിപ്പോര്‍ട്ടില്‍ പറയുന്നു.
