പട്‌ന: സര്‍ക്കാര്‍ ആശുപത്രിയിലെ ബെഡില്‍ ഗോതമ്പ് ഉണക്കാനിട്ട് ജീവനക്കാര്‍. ബിഹാറിലെ പശ്ചിം ചമ്പാരന്‍ ജില്ലയിലെ കമ്മ്യൂണിറ്റി ഹെല്‍ത്ത് സെന്ററിലാണ് സംഭവം. ഇവിടെ സന്ദര്‍ശിക്കാനെത്തിയ എം.എല്‍.എ ആശുപത്രിയുടെ കെടുകാര്യസ്ഥത തുറന്നുകാട്ടി. ആശുപത്രി ബെഡില്‍ ജീവനക്കാര്‍ ഗോതമ്പ് കഴുകി ഉണക്കാനിട്ടിരിക്കുന്ന കാഴ്ചയാണ് ജെഡിയു എംഎല്‍എ റിങ്കു സിംഗ് എന്ന ധീരേന്ദ്ര പ്രതാപ് സിംഗ് കണ്ടത്. സിഎച്ച്‌സിയിലെ ഓപ്പറേഷന്‍ തിയേറ്റര്‍ സ്റ്റോര്‍ റൂമായി ഉപയോഗിക്കുന്നതായും മരുന്നുകള്‍ ചവറ്റുകുട്ടയില്‍ വലിച്ചെറിയുന്നതായും എം.എല്‍.എ കണ്ടെത്തി. സിഎച്ച്‌സിയില്‍ എംഎല്‍എ നടത്തിയ അപ്രതീക്ഷിത പരിശോധനയിലാണ് ആശുപത്രിയിലെ കളളികള്‍ വെളിച്ചത്തായത്.
കൂടാതെ,സ്ത്രീകളുടെയും പുരുഷന്മാരുടെയും വാര്‍ഡുകളില്‍ അഴുക്കും പൊടിയും കുന്നുകൂടിക്കിടക്കുകയാണ്.’ഞങ്ങള്‍ ആശുപത്രിയുടെ രജിസ്റ്റര്‍ പരിശോധിച്ചപ്പോള്‍, നിരവധി ഡോക്ടര്‍മാരും നഴ്സുമാരും ഇല്ലെന്ന് കണ്ടെത്തി. ഓപ്പറേഷന്‍ തിയേറ്റര്‍ സ്റ്റോര്‍ റൂമായി ഉപയോഗിക്കുകയും ചെയ്യുകയാണ് ഇവിടെ. ഇത് ഇനിയും തുടരാന്‍ അനുവദിക്കാനാവില്ല. ജില്ലാ മജിസ്‌ട്രേറ്റിനെയും സിവില്‍ സര്‍ജനെയും കാണുമെന്നും പരാതിപ്പെടുമെന്നും ധീരേന്ദ്ര പ്രതാപ് സിംഗ് പറഞ്ഞു.
