കോന്നി : കോന്നി നഗരത്തില് വിഹരിക്കുന്ന തെരുവ് നായ്ക്കള് വാഹനങ്ങള്ക്ക് പുറകെ കുരച്ചുകൊണ്ട് ഓടുന്നത് അപകടങ്ങള്ക്ക് കാരണമാകുന്നു. ഇരുചക്ര വാഹനങ്ങള്ക്ക് പുറകെയും കാറുകള്ക്ക് പുറകെയുമാണ് നായകള് പാഞ്ഞടുക്കുന്നത്. റോഡരുകില് നില്ക്കുന്ന നായകള് ബൈക്ക് യാത്രക്കാര്ക്ക് മുന്നിലേക്ക് പെട്ടെന്ന് ചാടി വീഴുമ്പോള് വാഹനത്തിന്റെ നിയന്ത്രണം വിടുന്നതും പതിവാണ്. കഴിഞ്ഞ ദിവസം രാത്രിയിലും ഇത്തരത്തില് നായകള് സ്കൂട്ടറിന് പുറകെ ഓടിയിരുന്നു. പെട്ടെന്ന് ഭയന്നുപോയ യുവാവ് വാഹനം വെട്ടിച്ച് മാറ്റിയതിനാല് അപകടം ഒഴിവാകുകയായിരുന്നു.
കോന്നി നഗരത്തില് പലയിടത്തും ആളുകള് മാലിന്യം വലിച്ചെറിയുന്നത് തെരുവ് നായകളുടെ ശല്യം രൂക്ഷമാക്കിയിട്ടുണ്ട്. ഒഴിഞ്ഞു കിടക്കുന്ന കെട്ടിടങ്ങളും പറമ്പുകളുമാണ് നായ്ക്കള് ഇപ്പോള് താവളമാക്കുന്നത്. കോന്നി നഗരത്തിലെ വീടുകളുടെ മുറ്റത്ത് നിന്നും ചെരുപ്പ് കടിച്ചെടുത്ത് കൊണ്ടുപോകുന്നതും പതിവാകുന്നുണ്ട്. കോന്നിയിലെ നിര്മ്മാണം നടക്കുന്ന കെ.എസ്.ആര്.റ്റി.സി ഡിപ്പോ, നിലവിലെ കെ.എസ്.ആര്.റ്റി.സി ഓപ്പറേറ്റിംഗ് സ്റ്റേഷന്, നാരായണപുരം ചന്ത എന്നിവടങ്ങള് എല്ലാം തെരുവ് നായകള് കയ്യടക്കിയിട്ടുണ്ട്. മുന്പും നിരവധി ആളുകളാണ് നഗരത്തില് പേപ്പട്ടി ആക്രമണം നേരിട്ടിട്ടുള്ളത്.
