പത്തനംതിട്ട : വിദ്യാലയങ്ങള്‍ ഭാഗികമായി തുറന്ന സാഹചര്യത്തില്‍ എല്ലാ സ്വകാര്യ ബസുകളിലും വിദ്യാര്‍ത്ഥികള്‍ക്ക് 2020 ജൂലൈ മാസത്തില്‍ പുറപ്പെടുവിച്ച ഉത്തരവില്‍ പറയുന്ന പ്രകാരം 2.5 കിലോമീറ്ററിന് ഒരു രൂപയും 7.5 കിലോമീറ്റര്‍ വരെ 2 രൂപയും 12.5 കിലോമീറ്റര്‍ വരെ 3 രൂപയും തുടര്‍ന്നുള്ളതിന് 2014 ലെ ഉത്തരവില്‍ പറയുന്ന പ്രകാരം കോവിഡിന് മുന്നേ നിലവിലുണ്ടായിരുന്ന നിരക്കില്‍ കണ്‍സഷന്‍ ടിക്കറ്റിന് അര്‍ഹതയുണ്ടായിരിക്കും.
സര്‍ക്കാര്‍ തുറന്ന് പ്രവര്‍ത്തിക്കാന്‍ അനുവദിച്ചിരിക്കുന്ന പത്ത്, പന്ത്രണ്ട്, ഡിഗ്രി അവസാന വര്‍ഷം, പോസ്റ്റ് ഗ്രാഡ്വേറ്റ്, പ്രൊഫഷണല്‍ കോളേജ്, സാങ്കേതിക പരിശീലന വിഭാഗം വിദ്യാര്‍ത്ഥികള്‍ക്കാണ് ഇപ്പോള്‍ കണ്‍സഷന്‍ ടിക്കറ്റ് ലഭിക്കുന്നത്. വിദ്യാര്‍ത്ഥികള്‍ അവരുടെ വിദ്യാലയങ്ങള്‍ നല്‍കുന്ന ഐ ഡി കൈവശം സൂക്ഷിക്കണം. വിദ്യാര്‍ത്ഥികള്‍ക്ക് അര്‍ഹതപ്പെട്ട കണ്‍സഷന്‍ ടിക്കറ്റ് ലഭിക്കുന്നുവെന്ന് ഉറപ്പ് വരുത്താന്‍ വേണ്ട നടപടികള്‍ സ്വീകരിക്കാന്‍ ഗതാഗത കമ്മിഷണര്‍ക്ക് ഗതാഗത വകുപ്പ് മന്ത്രി എ.കെ ശശീന്ദ്രന്‍ നിര്‍ദ്ദേശം നല്‍കിയിട്ടുണ്ട്.
