ഖാര്‍ത്തൂം: സുഡാനില്‍ സൈന്യവും അര്‍ധസൈന്യവും തമ്മിലുണ്ടായ ആഭ്യന്തര കലാപത്തിനിടെ 56 പേര്‍ കൊല്ലപ്പെട്ടു. ഏറ്റുമുട്ടലില്‍ 595 പേര്‍ക്ക് പരുക്കേറ്റതായും അന്തര്‍ദേശീയ മാധ്യമങ്ങള്‍ റിപ്പോര്‍ട്ട് ചെയ്തു. സുഡാന്റെ തലസ്ഥാന നഗരമായ ഖാര്‍ത്തൂമില്‍ അര്‍ധ സൈനിക വിഭാഗവും സൈന്യവും തമ്മില്‍ കനത്ത ഏറ്റുമുട്ടല്‍ തുടരുകയാണ്. വ്യോമാക്രമണം ശക്തമായ സാഹചര്യത്തില്‍ സുഡാനിലേക്കുള്ള വിമാന സര്‍വീസുകള്‍ പല രാജ്യങ്ങളും നിര്‍ത്തിവച്ചു.
അതേസമയം ഏറ്റുമുട്ടല്‍ തുടരുന്നതിനിടയില്‍ ഇന്ത്യന്‍ പൗരന്‍മാര്‍ക്ക് സുരക്ഷാ നിര്‍ദേശം നല്‍കി ഇന്ത്യന്‍ എംബസി. ഔദ്യോഗിക കണക്കുകള്‍ പ്രകാരം 4000 ഇന്ത്യക്കാരാണ് സുഡാനിലുള്ളത്. ഇതില്‍ 1,200 പേര്‍ സ്ഥിരതാമസമാക്കാരാണ്. പുതിയ നിര്‍ദേശങ്ങള്‍ വരുന്നത് വരെ ക്ഷമയോടെ കാത്തിരിക്കണമെന്നും മന്ത്രാലയം ഞായറാഴ്ച ട്വീറ്ററില്‍ കുറിച്ചത്. പരമാവധി മുന്‍കരുതലുകളെടുക്കാനും വീടിനുള്ളില്‍ തന്നെ തുടരാനുമാണ് എംബസി ഇന്ത്യന്‍ പൗരന്‍മാര്‍ക്ക് നല്‍കുന്ന നിര്‍ദേശം.
