ഗോവ : വീട്ടുകാരെ അറിയിക്കാതെ വാലന്റൈന്സ് ഡേ ആഘോഷിക്കാന് ഗോവയിലേക്ക് പോയ യുവാവും യുവതിയും മുങ്ങിമരിച്ചു. ഉത്തര്പ്രദേശ് സ്വദേശികളായ സുപ്രിയ ദുബെ (26), വിഭു ശര്മ (27) എന്നിവരാണ് മരിച്ചത്. ചൊവ്വാഴ്ച വൈകിട്ട് ഗോവ പാലോലം ബീച്ചിലാണ് സംഭവം. സുപ്രിയയുടെ മൃതദേഹം ബീച്ചിലടിഞ്ഞതോടെ നാട്ടുകാര് പോലീസില് വിവരമറിയിച്ചു. ഇവരാണ് ലൈഫ് ഗാര്ഡിന്റെ സഹായത്തോടെ മൃതദേഹം കരക്കെത്തിച്ചത്. പിന്നാലെ വിഭുവിന്റെ മൃതദേഹവും കണ്ടെത്തി. ഇരുവരെയും കൊങ്കണ് സോഷ്യല് ഹെല്ത്ത് സെന്ററില് എത്തിച്ചെങ്കിലും നേരത്തെ തന്നെ മരിച്ചതായി ഡോക്ടര്മാര് അറിയിക്കുകയായിരുന്നു. മൃതദേഹങ്ങള് പോസ്റ്റുമോര്ട്ടത്തിന് അയച്ചിട്ടുണ്ട്.
കൊങ്കണ് പോലീസ് പറയുന്നതനുസരിച്ച് സുപ്രിയയും വിഭുവും അവധിക്കാലം ആഘോഷിക്കാന് ഗോവയില് എത്തിയതായിരുന്നു. സുപ്രിയ ബംഗളൂരുവിലും വിഭു ഡല്ഹിയിലുമാണ് താമസിച്ചിരുന്നത്. ഇരുവരും ബന്ധുക്കളായിരുന്നുവെന്നും ഗോവയിലാണെന്ന് കുടുംബത്തിന് അറിയില്ലായിരുന്നുവെന്നും പോലീസ് അറിയിച്ചു. കഴിഞ്ഞ രണ്ട് ദിവസമായി ഇരുവരും ഗോവയിലുണ്ടായിരുന്നു. തിങ്കളാഴ്ച രാത്രി പാലോലം ബീച്ചിന് സമീപം ഇവരെ കണ്ടതായി നാട്ടുകാര് പോലീസിനോട് പറഞ്ഞു. സംഭവത്തില് കൂടുതല് അന്വേഷണം നടന്നുവരികയാണ്.
