പെരുന്ന: കഴിവുള്ളവരും പരിചയസമ്പന്നരുമായ ആളുകൾ മുഖ്യമന്ത്രി സ്ഥാനത്തേക്ക് വരണമെന്ന് എൻഎസ്എസ് ജനറൽ സെക്രട്ടറി സുകുമാരൻ നായർ. മുഖ്യമന്ത്രി സ്ഥാനത്തേക്ക് വി.ഡി. സതീശനെ പരിഗണിക്കുന്ന കാര്യത്തിൽ തീരുമാനം എടുക്കേണ്ടത് കോൺഗ്രസ് ഹൈക്കമാൻഡാണെന്നും അദ്ദേഹം പറഞ്ഞു . മുഖ്യമന്ത്രി സ്ഥാനത്തെ ചൊല്ലി കോൺഗ്രസിനുള്ളിൽ ചർച്ചകൾ സജീവമാകുന്ന പശ്ചാത്തലത്തിലാണ് അദ്ദേഹം നിലപാട് വ്യക്തമാക്കിയത്. രമേശ് ചെന്നിത്തല, കെ.സി. വേണുഗോപാൽ, വി.ഡി. സതീശൻ തുടങ്ങിയ പേരുകൾ ചർച്ചയിലുണ്ടെങ്കിലും ഒരു പ്രത്യേക വ്യക്തിയെ തങ്ങൾ ഉയർത്തിക്കാട്ടുന്നില്ലെന്ന് അദ്ദേഹം അറിയിച്ചു.
സാധാരണയായി കോൺഗ്രസ് കേന്ദ്ര നേതൃത്വമാണ് ഇത്തരം കാര്യങ്ങൾ തീരുമാനിക്കാറുള്ളതെന്നും ആ തീരുമാനം എന്തുതന്നെയായാലും അംഗീകരിക്കുമെന്നും അദ്ദേഹം പറഞ്ഞു. വി.ഡി. സതീശന്റെ ചില മുൻകാല നിലപാടുകളോടുള്ള വിയോജിപ്പ് എൻഎസ്എസ് ഇപ്പോഴും ആവർത്തിക്കുന്നുണ്ട്. അദ്ദേഹത്തിന്റെ ചില സമീപനങ്ങളോടുള്ള അതൃപ്തി നേരത്തെയും അറിയിച്ചിട്ടുള്ളതാണ്. എന്നാൽ കോൺഗ്രസ് അദ്ദേഹത്തെ മുഖ്യമന്ത്രിയായി നിശ്ചയിക്കുകയാണെങ്കിൽ അത് ജനാധിപത്യപരമായ തീരുമാനമായിക്കണ്ട് അംഗീകരിക്കുകയല്ലാതെ മറ്റ് മാർഗമില്ലെന്നും അദ്ദേഹം അഭിപ്രായപ്പെട്ടു.
