പത്തനംതിട്ട : സാമൂഹിക പ്രവർത്തക ഡോ.എം.എസ്.സുനിൽ ഭവനരഹിതരായ നിരാലംബർക്ക് പണിതു നൽകുന്ന 190-മത്തെ സ്നേഹ ഭവനം ചെത്തോങ്കര പറപ്പള്ളിൽ മേപ്പറത്ത് നീതുവിനും കുടുംബത്തിനുമായി നല്‍കി. തുമ്പമൺ -കീരുകുഴി ശാന്തിപീഠത്തിൽ 95 വയസ്സുള്ള റിട്ട. അധ്യാപകനായ കെ. എസ് ജേക്കബിന്റെ സഹായത്താലാണ് ഭവനം നിർമ്മിച്ചത്. വീടിന്റെ താക്കോൽ ദാനവും ഉദ്ഘാടനവും കെ. എസ് ജേക്കബിന്റെ മകൻ ജെയിംസ് ജേക്കബും, സോമോൾ ജെയിംസും ചേർന്ന് നിർവഹിച്ചു.
വർഷങ്ങളായി വീടോ സ്ഥലമോ ഇവര്‍ക്കില്ലായിരുന്നു. ഭർത്താവ് ഉപേക്ഷിച്ചതിനെ തുടര്‍ന്ന് മൂന്നാംക്ലാസിൽ പഠിക്കുന്ന മകളുമായി ക്യാൻസർ രോഗിയായ പിതാവിനോടും അമ്മയോടും ഒപ്പം സുരക്ഷിതമല്ലാത്ത സാഹചര്യത്തിൽ കഴിഞ്ഞുകൂടുകയായിരുന്നു. നിത്യച്ചിലവിനും അച്ഛന്റെ ചികിത്സയ്ക്കുമായി ബുദ്ധിമുട്ടുകയായിരുന്നു നീതു. ചികിത്സയ്ക്കും വീടിനുമായി പല വാതിലുകൾ മുട്ടിയെങ്കിലും ഒരു സഹായവും എങ്ങുനിന്നും കിട്ടിയില്ല. ഇവരുടെ അവസ്ഥ മനസിലാക്കിയ ടീച്ചർ, കെ. എസ് ജേക്കബ് നൽകിയ മൂന്നര ലക്ഷം രൂപ ഉപയോഗിച്ച് രണ്ടു മുറികളും അടുക്കളയും ഹാളും ശുചിമുറിയും സിറ്റൗട്ടും അടങ്ങിയ 650sq.ft. വലിപ്പമുള്ള വീട് നിർമ്മിച്ചു നൽകുകയായിരുന്നു.
