ഹൈദരാബാദ്: വിവരാവകാശ പ്രവര്ത്തകന് കൊല്ലപ്പെട്ട നിലയില്. തെലങ്കാനയിലെ ജങ്കാവോണ് ജില്ലയിലാണ് സംഭവം. ഭൂമി പ്രശ്നത്തെ തുടര്ന്ന് വിരമിച്ച മണ്ഡല് പരിഷത്ത് ഡെവലപ്മെന്റ് ഓഫീസറായ നല്ല രാമകൃഷ്ണയ്യയെ തട്ടിക്കൊണ്ടുപോയി കൊലപ്പെടുത്തുകയായിരുന്നു. കൊലപാതകത്തില് മൂന്ന് പേരെ അറസ്റ്റ് ചെയ്തു.
70 കാരനായ നല്ല രാമകൃഷ്ണയ്യയെ കാണാതായി മൂന്ന് ദിവസത്തിന് ശേഷം ഞായറാഴ്ച മൃതദേഹം വെള്ളം നിറഞ്ഞ ക്വാറിയില് കണ്ടെത്തിയതോടെയാണ് കൊല്ലപ്പെട്ട വിവരം പുറത്തറിയുന്നത്. പ്രധാന പ്രതിയായ ജി അഞ്ജയ്യയ്ക്ക് രാമകൃഷ്ണയ്യയുമായി തര്ക്കമുണ്ടായിരുന്നുവെന്നും ഭൂമി പ്രശ്നത്തില് സര്ക്കാര് ഉദ്യോഗസ്ഥര്ക്ക് പരാതി നല്കിയതില് പകയുണ്ടാക്കിയതായും പോലീസ് പറഞ്ഞു. ഇതേതുടര്ന്ന്, രാമകൃഷ്ണയ്യയെ കൊല്ലാന് വാടക കൊലയാളി സംഘത്തെ നിയോഗിച്ചു. ജൂണ് 15 ന് പോച്ചണ്ണപേട്ടയില് വച്ചാണ് സംഘം രാമകൃഷ്ണയ്യയെ തട്ടിക്കൊണ്ടുപോയത്. തുടര്ന്ന് കഴുത്ത് ഞെരിച്ച് കൊലപ്പെടുത്തിയ ശേഷം മൃതദേഹം ക്വാറിയില് തള്ളുകയും ചെയ്തുവെന്ന് പോലീസ് വ്യക്തമാക്കി. ഒളിവിലുള്ള മറ്റ് പ്രതികളെ പിടികൂടാനുള്ള ശ്രമങ്ങള് തുടരുകയാണ്.
