ചോറൂണിനിടെ ആനക്കൊട്ടിലിന്റെ കോൺക്രീറ്റ് ഭാഗം കുഞ്ഞിന്റെ അമ്മയുടെ തലയിൽ വീണ് പരിക്ക് ; കുഞ്ഞ് രക്ഷപ്പെട്ടത് തലനാരിഴയ്ക്ക്

ആലപ്പുഴ: കുഞ്ഞിന്റെ ചോറൂണിനിടെ ആനക്കൊട്ടിലിന്റെ മേല്‍ഭാഗത്തെ കോണ്‍ക്രീറ്റ് ഇളകി വീണ് അപകടം. കുഞ്ഞിന്റെ അമ്മയുടെ തലയിലാണ് കോണ്‍ക്രീറ്റ് കഷ്‌ണം വീണത്. പരിക്കേറ്റ ഇവരെ ആശുപത്രിയില്‍ പ്രവേശിപ്പിച്ചു. കലവൂര്‍ ക്ഷേത്രത്തില്‍ രാവിലെ 10 മണിക്കാണ് സംഭവം നടന്നത്. ആറ് മാസം പ്രായമുള്ള അഭയ ദേവിന്റെ ചോറൂണിനിടെയാണ് കലവൂര്‍ ചിന്നമ്മ കവല സ്വദേശി ആര്യയ്ക്ക് പരിക്കേറ്റത്. ചോറൂണിനായി കുഞ്ഞിനെ ആനക്കൊട്ടിലില്‍ ഇരുത്തിയതിന് തൊട്ടുപിന്നാലെയാണ് അപകടം ഉണ്ടായത്. ആര്യയുടെ തലയില്‍ നാല് തുന്നല്‍ വേണ്ടി വന്നുവെന്ന് ഡോക്ടര്‍ അറിയിച്ചു. കുഞ്ഞ് അപകടത്തില്‍ പരിക്കേല്‍ക്കാതെ രക്ഷപ്പെട്ടു.