പമ്പ : അതീവ സുരക്ഷാ മേഖലയായ ശബരിമല സന്നിധാനത്തും പമ്പയിലും എൻ.എസ്.ജി കമാൻഡോകളും കേരള പോലീസിന്റെ കമാൻഡോ വിഭാഗവും ജില്ലാ പോലീസും സംയുക്തമായി മോക്ക് ഡ്രിൽ സംഘടിപ്പിച്ചു. അതീവ സുരക്ഷാമേഖലയിൽ ഒരു ഭീകരാക്രമണം ഉണ്ടായാൽ രക്ഷാപ്രവർത്തനം നടത്തേണ്ടത് എങ്ങനെയെന്ന പരിശീലനത്തിന്റെ ഭാഗമായാണ് മോക്ക് ഡ്രിൽ സംഘടിപ്പിച്ചത്. ഡൽഹിയിൽ നിന്നുള്ള 150 ഓളം എൻ.എസ്.ജി കമാൻഡോകളും കേരള പൊലീസിൻ്റെ കമാൻഡോ വിഭാഗത്തിലെ 30 കമാൻഡോകളും ജില്ലാ പോലീസിൽ നിന്നുള്ള അൻപതോളം ഉദ്യോഗസ്ഥരും മോക്ക് ഡ്രില്ലിൽ പങ്കെടുത്തു.
ജില്ലാ പോലീസ് മേധാവി ആർ.ആനന്ദ് ഐ.പി.എസ്, എൻ.എസ്.ജിയുടെ ഉന്നത ഉദ്യോഗസ്ഥർ എന്നിവർ നേതൃത്വം നൽകി. പത്തനംതിട്ട ജില്ലയിലെ ഡി.വൈ.എസ്.പിമാർ, എസ്.എച്ച്. ഒമാർ എന്നിവരും പങ്കെടുത്തു. സന്നിധാനത്തും പമ്പയിലും പ്രത്യേകം പരിശീലനം നടന്നു. ഭീകരാക്രമണത്തിലൂടെ ബന്ദികളാക്കിയ ആൾക്കാരെ കമാൻഡോ ഓപ്പറേഷനിലൂടെ സുരക്ഷിതരായി മോചിപ്പിക്കുകയും ഭീകരരെ കീഴ്പ്പെടുത്തുകയും ചെയ്യുന്നതിനുള്ള പരിശീലനമാണ് നടത്തിയത്. ജില്ലാ ഭരണകൂടത്തിന്റെയും വിവിധ സർക്കാർ വകുപ്പുകളുടെയും ഏകോപനത്തിലാണ് പരിപാടി നടന്നത്.
