വയനാട്: കോടമഞ്ഞ് പുതഞ്ഞുകിടക്കാറുള്ള മനോഹരമായ വ്യൂപോയിന്റും ചാരുതയാര്ന്ന പ്രകൃതിദൃശ്യങ്ങളും ഹെയര്പിന്വളവുകളും മനംകവരുന്ന സഞ്ചാരപാതയാണ് താമരശ്ശേരി ചുരം. രൂക്ഷമായ ഗതാഗത പ്രതിസന്ധിയെപ്പോലെത്തന്നെ ഗുരുതരപ്രശ്നമാണ് മാലിന്യവും. നിരീക്ഷണം ശക്തമാക്കിയും നിയമനടപടികള് കര്ശനമാക്കിയും മാലിന്യനിക്ഷേപത്തിന് അറുതിവരുത്തുമെന്ന് മാറിമാറി വരുന്ന ജില്ലാഭരണകൂടങ്ങളും പുതുപ്പാടി ഗ്രാമപ്പഞ്ചായത്ത് ഭരണസമിതികളും പോലീസ്-ഫോറസ്റ്റ് അധികാരികളും അവകാശപ്പെടാറുണ്ടെങ്കിലും ശാശ്വതപരിഹാരം ഇപ്പോഴും അകലെയാണ്. ചുരത്തിലെ വീപ്പകളില് കെട്ടിക്കിടക്കുന്ന മാലിന്യം സമയബന്ധിതമായി നീക്കംചെയ്യാനും ശ്രമമുണ്ടാവുന്നില്ല. സഞ്ചാരികള് ഏറ്റവും കൂടുതല് തമ്പടിക്കാറുള്ള വ്യൂപോയിന്റിലും മിനി വ്യൂപോയിന്റിലും മറ്റുമെല്ലാം മാലിന്യം കൂമ്പാരമായിക്കിടക്കുന്ന സാഹചര്യമാണ്.
പാതയോരങ്ങളിലും ഓവുചാലുകളിലുമെല്ലാം പ്ലാസ്റ്റിക് മാലിന്യം ചിതറിക്കിടപ്പുണ്ട്. വ്യൂപോയിന്റിന്റെ തുടക്കത്തില് നിലകൊള്ളുന്ന വലിയവീപ്പ ഡയപ്പറുകളും നാപ്കിനും പ്ലാസ്റ്റിക്കുമെല്ലാം നിറഞ്ഞു. അതിന്റെ മുകള്ഭാഗത്തുള്ള മാലിന്യം കുരങ്ങന്മാരും കാക്കകളുമെല്ലാം വലിച്ചുപുറത്തേക്കിട്ട നിലയിലാണ്. വ്യൂപോയിന്റില്നിന്ന് കുത്തനെ താഴോട്ടുനോക്കിയാല് പ്രകൃതിദൃശ്യത്തെക്കാളുമാദ്യം കണ്ണില്പ്പെടുക സഞ്ചാരികളിലെ സമൂഹവിരുദ്ധര് കാലങ്ങളായി നിക്ഷേപിച്ച ആയിരക്കണക്കിന് പ്ലാസ്റ്റിക് ബോട്ടിലുകളും മറ്റുമാണ്. ഇങ്ങനെ ഉപേക്ഷിക്കപ്പെടുന്നവ തിന്നാന് ശ്രമിക്കുന്ന വാനരര് പതിവുകാഴ്ചയാണ്.
