മലപ്പുറം: താനൂരില് പോലീസ് കസ്റ്റഡിയില് മരിച്ച് താമിര് ജിഫ്രിയുടെ പോസ്റ്റ്മോര്ട്ടം റിപ്പോര്ട്ട് പുറത്ത്. താമിര് ജിഫ്രിയുടെ ശരീരത്തില് മയക്കു മരുന്ന് ഉപയോഗത്തെ തുടര്ന്നുണ്ടായ നിരവധി പ്രശ്നങ്ങള് കണ്ടെത്തി. ശ്വാസകോശത്തില് നീര് കെട്ടിയിരുന്നു. അതുപോലെ ഹൃദയ ധമനികള്ക്കും തടസ്സമുണ്ടായിരുന്നു. ശരീരത്തില് 21 മുറിവുകളുണ്ടായിരുന്നു. ജിഫ്രിക്ക് പോലീസ് കസ്റ്റഡിയില് മര്ദ്ദനമേറ്റിരുന്നു. ഇടുപ്പിലും കാല്പാദത്തിലും കണംകാലിലും മര്ദ്ദനമേറ്റതായി കാണുന്നു. പോലീസ് മര്ദ്ദനവും മരണത്തിന് കാരണമായതായി പോസ്റ്റ്മോര്ട്ടം റിപ്പോര്ട്ടില് പറയുന്നുണ്ട്. അതുപോലെ ആമാശയത്തില് രണ്ടു പാക്കറ്റുകളുണ്ടായിരുന്നു. ഒന്ന് പൊട്ടിയ നിലയിലായിരുന്നു.
ലഹരി മരുന്ന് കേസില് കസ്റ്റഡിയിലെടുത്ത തിരൂരങ്ങാടി സ്വദേശി താമിര് ജിഫ്രിയാണ് കഴിഞ്ഞ ദിവസം മരിച്ചത്. താമിര് ജിഫ്രിയെയും മറ്റ് നാല് പേരെയും എംഡിഎംഎയുമായി കഴിഞ്ഞ ദിവസം പുലര്ച്ചെ 1.45 ഓടെയാണ് താനൂരില് നിന്നും പിടി കൂടിയതെന്നാണ് പോലീസ് പറയുന്നത്. ലോക്കപ്പില് വെച്ച് ശാരീരിക പ്രശ്നങ്ങള് ഉണ്ടായെന്ന് പുലര്ച്ചെ കൂടെ ഉള്ളവര് അറിയിച്ചെന്നും നാലരയോടെ സ്വകാര്യ ആശുപത്രിയില് എത്തുമ്പോഴേക്കും മരിച്ചെന്നുമാണ് പോലീസ് വിശദീകരണം.
