വെണ്ണിക്കുളം : മല്ലപ്പള്ളിയിലെയും വെണ്ണിക്കുളത്തെയും വലിയ തോടുകള് മാലിന്യ കേന്ദ്രങ്ങളായി മാറുമ്പോള് നടപടി സ്വീകരിക്കാതെ ആരോഗ്യ വകുപ്പും മല്ലപ്പള്ളി ഗ്രാമ പഞ്ചായത്തും. പ്ലാസ്റ്റിക് മാലിന്യങ്ങള് ഉള്പ്പെടെയുള്ളവയാണ് തോടുകളിലേക്ക് തള്ളുന്നത്. മല്ലപ്പള്ളി പഞ്ചായത്ത് ബസ് സ്റ്റാന്റിനോട് ചേര്ന്ന് ഒഴുകുന്ന വലിയ തോടിന്റെ വിവിധ ഭാഗങ്ങളിലാണ് മാലിന്യം കൂടുതല് തള്ളുന്നത്. പ്ലാസ്റ്റിക്ക് കപ്പുകളും കവറുകളും ഭക്ഷണം പാക്ക് ചെയ്യുന്ന സാധനങ്ങളുമാണ് കൂടുതലും. തോട്ടില് ഇപ്പോള് നീരൊഴുക്ക് ഇല്ലെങ്കിലും ഉപേക്ഷിക്കപ്പെടുന്ന മാലിന്യങ്ങള് മഴക്കാലത്ത് മണിമലയാറ്റിലേക്കാണ് ഒഴുകി എത്തുന്നത്. പ്രദേശത്തെ വ്യാപാര സ്ഥാപനങ്ങളാണ് മാലിന്യങ്ങള് തള്ളുന്നത്തില് മുമ്പിലെന്നാണ് നാട്ടുകാരുടെ പരാതി.
ഹരിതകര്മ്മസേന എല്ലാ മാസവും വ്യാപാര സ്ഥാപനങ്ങളില് നിന്നും അജൈവ മാലിന്യങ്ങള് സംഭരിക്കുന്നുണ്ട്. എന്നാല് മിക്ക വ്യാപാരികളും മാലിന്യം തോട്ടിലേക്ക് തള്ളുകയാണ്. വെണ്ണിക്കുളം ചന്തയോട് ചേര്ന്ന് ഒഴുകുന്ന വലിയ തോട്ടിലും പലയിടങ്ങളിലായി മാലിന്യം കുന്നുകൂടി കിടക്കുകയാണ്. മണിമലയാറ്റിലെ കോമളം കടവിലാണ് തോട് വന്നു ചേരുന്നത്. കെട്ടിക്കിടക്കുന്ന മാലിന്യങ്ങള് കാരണം ഗുരുതരമായ ആരോഗ്യ പ്രശ്നങ്ങളും ഉണ്ടാകും. തോട്ടില് മാലിന്യം തള്ളുന്നവര്ക്കെതിരെ കര്ശന നടപടി സ്വീകരിക്കണമെന്നാണ് നാട്ടുകാരുടെ ആവശ്യം.
