പത്തനംതിട്ട : കൃത്യമായ പരിപാലനവും ഭരണപരമായ ഇടപെടലുകളും ലഭിക്കാതെ ഈ- ടോയ് ലെറ്റ് പദ്ധതികള് പരാജയപ്പെട്ടു. 2010 ല് തിരുവനന്തപുരം ആസ്ഥാനമാക്കിയുള്ള ഇറാം സൈന്റിഫിക് സൊലൂഷന് എന്ന സ്ഥാപനമാണ് അത്യാധുനിക രീതിയിലുള്ള ഒട്ടോമാറ്റിക്ക് ടോയ് ലെറ്റുകള് വികസിപ്പിച്ചെടുത്തത്. 2010 ല് കോഴിക്കോട് ജില്ലയില് ആദ്യത്തെ ഇ – ടോയ് ലെറ്റ് സ്ഥാപിച്ച ശേഷം പിന്നീട് ഇത് മറ്റു ജില്ലകളിലേക്കും വ്യാപിപ്പിച്ചു. പത്തനംതിട്ട ജില്ലയില് കോന്നി ആനക്കൂട്, പെരുനാട്, നാറാണംമൂഴി, നെടുംപ്രം, ഓമല്ലൂര്, സീതത്തോട്, ഇരവിപേരൂര് തുടങ്ങിയ സ്ഥലങ്ങളിലൊക്കെ കൊട്ടിഘോഷിച്ച് ഉത്ഘാടനം നടത്തിയ ഈ ടോയ് ലെറ്റുകള് അധികൃതരുടെ അനാസ്ഥ കാരണം നശിച്ചു.
നാണയം ഉപയോഗിച്ച് പണം ഇട്ടശേഷം ഉപയോഗിക്കുന്നവായിരുന്നു ഇവയെല്ലാം. ടോയ് ലെറ്റിന് ഉള്ളില് ഓട്ടോമാറ്റിക് ലൈറ്റ്, ഫ്ലഷിംഗ്, ഫ്ലോര് ക്ലീനിംഗ് എന്നിവയെല്ലാം ചേര്ന്നതായിരുന്നു ഈ സംവിധാനം. ഉപഭോക്താവ് ടോയ് ലെറ്റിന് ഉള്ളില് കടന്നാല് ഫാനും ലൈറ്റും താനേ പ്രവര്ത്തിക്കും. എന്നാല് അറ്റകുറ്റപണികള് നടത്താതെയും പരിപാലിക്കാതെയും വന്നതോടുകൂടി ഇവയെല്ലാം നശിച്ചു. പദ്ധതിക്കായി ചിലവഴിച്ച കോടികളും നഷ്ടപ്പെട്ടു. പല പഞ്ചായത്തുകളുടെയും ശുചിമുറികള് പ്രവര്ത്തിക്കുന്നുണ്ടെങ്കിലും മിക്കവയും വൃത്തിഹീനമായ നിലയിലായതിനാല് പൊതുജനങ്ങള് ഇത് ഉപയോഗിക്കുവാന് മടിക്കുന്നു. സെപ്ടിക് ടാങ്കുകള് പോലും പൊട്ടികിടക്കുന്ന അവസ്ഥയാണ് പലയിടത്തും.
ജില്ലയിലെ തദ്ദേശ സ്വയംഭരണ സ്ഥാപനങ്ങള് മറ്റു പദ്ധതികള്ക്കായി പണം വാരിക്കോരി ചിലവഴിക്കുമ്പോള് ശുചിമുറികള്ക്കായി ഒന്നും തന്നെ ചിലവിടുന്നില്ല എന്നതാണ് വാസ്തവം. ജില്ലാ ആസ്ഥാനത്തും സ്ഥിതി വത്യസ്തമല്ല. പത്തനംതിട്ട നഗര ഹൃദയത്തില് എത്തുന്ന ആളുകളും ശുചിമുറികള് തേടി അലയേണ്ടി വരുന്നു. ദീര്ഘദൂര യാത്രക്കാരായ സ്ത്രീകള് അടക്കമുള്ളവര് ഈ പ്രശ്നം നേരിടുന്നുണ്ട്. അടുത്തുള്ള പെട്രോള് പമ്പുകളെയോ ഹോട്ടലുകളെയോ ആശ്രയിക്കേണ്ട സ്ഥിതിയാണ് നിലവിലുള്ളത്.
