തിരുവനന്തപുരം : പരീക്ഷ നടത്താന് സര്ക്കാര് സജ്ജമെന്ന് വിദ്യാഭ്യാസമന്ത്രി വി.ശിവന്കുട്ടി. പരീക്ഷ നടത്താന് സുപ്രീംകോടതി അനുമതി നല്കിയതിന് പിന്നാലെയായിരുന്നു മന്ത്രിയുടെ പ്രതികരണം.
സുപ്രീംകോടതി വിധിയുടെ വിശദാംശങ്ങള് ലഭ്യമായാല് മുഖ്യമന്ത്രിയുമായും മറ്റു വകുപ്പുകളുമായും കൂടിയാലോചിച്ച് പ്ലസ് വണ് പരീക്ഷയ്ക്കായി പുതിയ സമയക്രമം തയാറാക്കുമെന്നും കോവിഡ് മാനദണ്ഡങ്ങള് പൂര്ണമായും പാലിച്ചാകും പരീക്ഷകള് നടത്തുക എന്നും മന്ത്രി വ്യക്തമാക്കി. എല്ലാ സ്കൂളുകളില് അണുനശീകരണം നടത്തും. ചോദ്യപ്പേപ്പര് നേരത്തെ തന്നെ സ്കൂളില് എത്തിച്ചിട്ടുണ്ട്. ഇതിന് സുരക്ഷയും ഏര്പ്പെടുത്തിയിട്ടുണ്ട്. വിദ്യാര്ഥികള് ആശങ്കപ്പെടേണ്ട സാഹചര്യമില്ലെന്നും ഒരു ബുദ്ധിമുട്ടും ഉണ്ടാകാത്ത വിധം പരീക്ഷകള് നടത്തുമെന്നും മന്ത്രി പറഞ്ഞു.
പരീക്ഷ നടത്തിപ്പിന് എതിരായ പ്രചാരണങ്ങളില് നിന്ന് ബന്ധപ്പെട്ടവര് പിന്മാറണമെന്ന് മന്ത്രി ആവശ്യപ്പെട്ടു. ഭൂരിഭാഗം വിദ്യാര്ത്ഥികളും പരീക്ഷ നടത്തണമെന്ന് ആഗ്രഹിക്കുന്നു. ഒരു ചെറിയ വിഭാഗം മാത്രം അതിനെതിരായ പ്രചാരണങ്ങള് നടത്തുന്നതെന്നും മന്ത്രി പറഞ്ഞു.
