പത്തനംതിട്ട : പത്തനംതിട്ട നഗരത്തിലെ ഓടയില് കക്കൂസ് മാലിന്യം തള്ളിയ സംഭവത്തില് ആനന്ദഭവന് ഹോട്ടലില് നഗരസഭ ആരോഗ്യ വകുപ്പ് അധികൃതര് പരിശോധന നടത്തി. ഹെല്ത്ത് ഇന്സ്പെക്ട്ര് സതീഷിന്റെ നേതൃത്വത്തിലുള്ള സംഘമാണ് പത്തനംതിട്ട നഗരത്തില് പ്രവര്ത്തിക്കുന്ന ഹോട്ടലില് പരിശോധന നടത്തിയത്. ഹോട്ടലിലെ ശുചിമുറിയുടെ ക്ലോസറ്റില് ഉജാല വെള്ളം കലക്കി ഒഴിച്ചപ്പോള് ഈ വെള്ളം ഓടയിലേക്ക് ഒഴുകി ഇറങ്ങിയതായി ആരോഗ്യ വകുപ്പ് അധികൃതരുടെ ശ്രദ്ധയില്പ്പെട്ടു. ഹോട്ടലിലെ മലിന ജലം ശുദ്ധീകരിച്ച ശേഷം മാത്രമേ ഓടയില് ഒഴുക്കാവൂ എന്നും ഇതിന് പ്രത്യേക സംവിധാനം ഏര്പ്പെടുത്തണമെന്നും നഗരസഭാ ആരോഗ്യ വകുപ്പ് ഹോട്ടല് ഉടമയ്ക്ക് നിര്ദേശം നല്കി. മുന്പും മലിനജലം ഓടയില് ഒഴുക്കിയതിന് ഹോട്ടലിനെതിരെ ആരോഗ്യ വകുപ്പ് അധികൃതര് നടപടി സ്വീകരിച്ചിരുന്നു.
ഹോട്ടലിലെ അടുക്കളയില് നിന്നും പാത്രം കഴുകിയ വെള്ളവും സോപ്പ് നിറഞ്ഞ വെള്ളവും ഇതേ ഓടയില് ഒഴുക്കിയതിന് ഹോട്ടലിനെതിരെ മുന്പും ആരോഗ്യ വകുപ്പ് നടപടി സ്വീകരിച്ചിരുന്നു. ഇതിന് ശേഷമാണ് കഴിഞ്ഞ ദിവസം ഓടയിലെ മാലിന്യങ്ങള് സ്ലാബ് ഇളക്കി നീക്കം ചെയ്തപ്പോള് ഹോട്ടലില് നിന്നുള്ള കക്കൂസ് മാലിന്യം ഓടയിലേക്ക് ഒഴുക്കിയതായി ശ്രദ്ധയില്പ്പെട്ടത്. ഓടയില് നിറഞ്ഞ മാലിന്യം അന്നേ ദിവസം മഴ കൂടി പെയ്തതോടെ നഗരത്തില് പരക്കുകയും ചെയ്തിരുന്നു. പത്തനംതിട്ട നഗരത്തിലെ പല ഹോട്ടലുകളും ഇത്തരത്തില് മാലിന്യം ഓടയിലേക്ക് തള്ളുന്നതായാണ് അറിയുവാന് കഴിയുന്നത്. മഴക്കാല രോഗങ്ങള് വര്ധിച്ച സാഹചര്യത്തില് ഇത് ജനങ്ങളില് ഗുരുതരമായ ആരോഗ്യ പ്രശ്നങ്ങള്ക്ക് കാരണമാകും എന്നതിനാല് ആരോഗ്യ വകുപ്പിന്റെ അടിയന്തിര ഇടപെടല് ആവശ്യമാണ്.
