പത്തനംതിട്ട : റാന്നി ഗ്രാമപഞ്ചായത്ത് പ്രസിഡന്റ് തെരഞ്ഞെടുപ്പില് ബി.ജെ.പിയെ ഒഴിവാക്കിക്കൊണ്ട് സ്വതന്ത്ര അംഗമായ പ്രകാശ് കുഴിക്കാലയെ പിന്തുണക്കണമെന്ന ഡി.സി.സി നിര്ദ്ദേശത്തിന് വിരുദ്ധമായി ബി.ജെ.പി പിന്തുണയോടെ മത്സരിച്ച പ്രകാശ് കുഴിക്കാലയെ പിന്തുണച്ച നാല് കോണ്ഗ്രസ് ഗ്രാമപഞ്ചായത്ത് അംഗങ്ങളേയും ഇന്ത്യന് നാഷണല് കോണ്ഗ്രസില് നിന്നും സസ്പെന്റ് ചെയ്തതായി പത്തനംതിട്ട ഡി.സി.സി പ്രസിഡന്റ് പ്രൊഫ. സതീഷ് കൊച്ചുപറമ്പില് അറിയിച്ചു. ഗ്രാമ പഞ്ചായത്ത് അംഗങ്ങളായ മിനി തോമസ്, സിന്ധു സജ്ഞയന്, പ്രസന്നകുമാരി, മിനു ഷാജി എന്നിവരെയാണ് അന്വേഷണ വിധേയമായി കോണ്ഗ്രസ് പാര്ട്ടിയില് നിന്നും സസ്പെന്റ് ചെയ്തത്.
തദ്ദേശ സ്വയംഭരണ സ്ഥാപനങ്ങളില് ഒരു സ്വാഹചര്യത്തിലും ബി.ജെ.പി. പിന്തുണ സ്വീകരിക്കരുതെന്ന കെ.പി.സി.സി നയത്തിന് വിരുദ്ധമായി ജില്ലയില് യാതൊരു ബന്ധത്തിനും ഡി.സി.സി തയ്യാറാവില്ലെന്നും കോണ്ഗ്രസ് അംഗങ്ങള് പേര് നിര്ദ്ദേശിച്ച സ്വതന്ത്ര അംഗത്തെ ബി.ജെ.പി കൂടി പിന്തുണച്ചതാണ് റാന്നിയില് ഉണ്ടായതെന്നും അത്തരം ഒരു സാഹചര്യം ഒഴിവാക്കുവാന് കോണ്ഗ്രസ് അംഗങ്ങള് പ്രസിഡന്റ് തെരഞ്ഞെടുപ്പ് ബഹിഷ്ക്കരിക്കുവാനുള്ള നിര്ദ്ദേശം പാലിക്കാതിരുന്നതാണ് റാന്നി ഗ്രാമപഞ്ചായത്തിലുണ്ടായത്. ഇത് അംഗീകരിക്കുവാന് സാധിക്കുകയില്ലെന്ന് ഡി.സി.സി പ്രസിഡന്റ് വ്യക്തമാക്കി.
