അജ്മാൻ : പ്രവാസിയായ രോഗിക്ക് നാട്ടിലേക്ക് പോകാൻ തുണയായി അജ്മാൻ പോലീസ്. അപകടത്തിൽ പരിക്കേറ്റ് കിടപ്പായ 57 വയസ്സുള്ള ഏഷ്യൻ വംശജനാണ് പോലീസ് സഹായമായത്. അപകടത്തിൽ ഇദ്ദേഹത്തിന് അംഗവൈകല്യം സംഭവിച്ചിരുന്നു. മൂന്ന് വർഷത്തോളം ചികിത്സിച്ചു. തുടർച്ചികിത്സക്കായി നാട്ടിലേക്ക് പോകാനും കുടുംബത്തിന്റെ പരിചരണത്തിനും സാധിക്കാതിരുന്ന ഇദ്ദേഹത്തിന് പോലീസ് തുണയാവുകയായിരുന്നു.
ഇതിന്റെ ഭാഗമായി അജ്മാൻ മസ്ഫൂത്തിലെ ശൈഖ് ഖലീഫ ആശുപത്രി, ദുബായ് വിമാനത്താവളം, ഇദ്ദേഹത്തിന്റെ മാതൃരാജ്യത്തെ വിമാനത്താവളം എന്നിവയുമായി ബന്ധപ്പെട്ട് യാത്രക്കുള്ള നടപടിക്രമങ്ങൾ പോലീസ് ഏകോപിപ്പിച്ചു. നിശ്ചയദാർഢ്യമുള്ള ആളായതിനാൽ അദ്ദേഹത്തിന് പ്രത്യേക യാത്രാ സംവിധാനവും ആവശ്യമായിരുന്നു. സുരക്ഷിതമായി നാട്ടിലെ കുടുംബത്തോടൊപ്പം എത്തിയെന്ന് ഉറപ്പ് വരുത്താനായി ഒരു സ്വകാര്യ സംഘത്തിന്റെ സേവനവും അജ്മാൻ പോലീസ് ഒരുക്കിയിരുന്നു.
