ന്യൂഡല്ഹി: ഡല്ഹി നിയമസഭാ തെരഞ്ഞെടുപ്പു പ്രചാരണകാലത്തെ വിദ്വേഷപ്രസംഗങ്ങളില് ബിജെപി നേതാക്കളായ അനുരാഗ് താക്കൂര്, പര്വേഷ് വര്മ എന്നിവരെ വിട്ടയച്ച നടപടി പുനഃപരിശോധിക്കണമെന്ന ആവശ്യം സുപ്രിംകോടതി തള്ളി. സിപിഎം നേതാവ് വൃന്ദ കാരാട്ട് നല്കിയ ഹരജിയാണു തള്ളിയത്.അനുരാഗിനും പര്വേഷിനുമെതിരെ കേസെടുക്കാന് മജിസ്ട്രേട്ട് കോടതി വിസമ്മതിച്ചിരുന്നു. ഇതു ശരിവച്ച ഡല്ഹി ഹൈക്കോടതി വിധിക്കെതിരെയാണ് വൃന്ദ കാരാട്ട് ഹരജി നല്കിയത്.
ഏപ്രില് 29ലെ വിധിയില് പിഴവൊന്നും കണ്ടെത്താനായില്ലെന്നും പുനഃപരിശോധനയ്ക്ക് അടിസ്ഥാനമില്ലെന്നും സുപ്രിംകോടതി വ്യക്തമാക്കി.2020ലെ തെരഞ്ഞെടുപ്പു വേളയിലായിരുന്നു വിവാദ പരാമര്ശം. ‘രാജ്യദ്രോഹികളെ വെടിവെച്ചുകൊല്ലും’ എന്നായിരുന്നു തെരഞ്ഞെടുപ്പ് റാലിയില് അനുരാഗ് താക്കൂര് പ്രസംഗിച്ചത്. പര്വേഷ് വര്മ ഷഹീന് ബാഗിലെ പ്രതിഷേധക്കാരെ നുഴഞ്ഞുകയറ്റക്കാരെന്നും വീടുകളില് അതിക്രമിച്ചുകയറി ബലാത്സംഗം നടത്തുന്നവരെന്നും വിശേഷിപ്പിച്ചിരുന്നു. എന്നാല്, ഏതെങ്കിലുമൊരു സമുദായത്തെ ലക്ഷ്യമിട്ടല്ല പ്രസ്താവനകളെന്ന് ചൂണ്ടിക്കാട്ടിയാണ് ഇരുവര്ക്കുമെതിരെ കേസെടുക്കാന് വിസമ്മതിച്ചത്.
