തിരുവനന്തപുരം : സഹോദരിയുടെ മൃതദേഹത്തിനരികിൽ വെച്ച് അനുജത്തി കുഴഞ്ഞു വീണ് മരിച്ചു. തിരുവനന്തപുരം പോത്തൻകോട് പാലോട്ടുകോണം ലക്ഷംവീട് കോളനിയിലാണ് സംഭവം. പാലോട്ടുകോണം രാധാ മന്ദിരത്തിൽ പരേതനായ ജോൺസന്റെ ഭാര്യ രാധ (74) ഇന്നലെ വെളുപ്പിന് 2 മണിക്കാണ് മരണമടഞ്ഞത്. രാധയുടെ മൃതദേഹം കാണാനെത്തിയ അനുജത്തി ശൈലജ (65)ആണ് മൃതദേഹത്തിനരികിൽ വെച്ച് കുഴഞ്ഞ് വീണ് മരിച്ചത്. ചേങ്കോട്ടുകോണം കല്ലടിച്ചവിള ശൈലജ ഭവനിൽ പരേതനായ മണിയന്റെ ഭാര്യയാണ് ശൈലജ.
മരണമറിഞ്ഞ് വെളുപ്പിന് തന്നെ വീട്ടിലെത്തിയ ശൈലജ സഹോദരിയുടെ മൃതദേഹത്തിനരികിൽ കുഴഞ്ഞ് വീഴുകയായിരുന്നു. ഹൃദയാഘാതമാണ് മരണകാരണം. സഹോദരിമാർ തമ്മിൽ വലിയ സ്നേഹത്തിലായിരുന്നുവെന്ന് ബന്ധുക്കൾ പറഞ്ഞു. ഇരുവരുടെയും അന്ത്യ കർമ്മങ്ങൾ ഒരിടത്ത് തന്നെ നടത്തി. മൃതദേഹങ്ങൾ നെടുമങ്ങാട് ശാന്തിതീരത്ത് സംസ്കരിച്ചു.
