തിരുവനന്തപുരം: ഓട്ടോയിൽ കറങ്ങി വാഹനങ്ങളിൽ നിന്ന് ബാറ്ററി മോഷ്ടിക്കുന്ന രണ്ടുപേർ അറസ്റ്റിൽ. വർക്കല, വെട്ടൂർ വിളഭാഗം രോഹിണിയിൽ ഷിനു (33), വിളഭാഗം കുട്ടത്തി വീട്ടിൽ ഇക്ബാൽ (57) എന്നിവരാണ് പിടിയിലായത്. കിളിമാനൂർ പോലീസ് സ്റ്റേഷൻ പരിധിയിൽ രാത്രിയിൽ ഓട്ടോയിൽ കറങ്ങി ലോറികളിലെ ബാറ്ററി മോഷ്ടിക്കുകയും മോഷണശേഷം മുങ്ങിനടക്കുകയുമാണ് പ്രതികളുടെ രീതിയെന്ന് പോലീസ് പറയുന്നു.
കിളിമാനൂർ പോലീസ് സ്റ്റേഷൻ പരിധിയിൽ പ്രതികൾക്കെതിരെ മൂന്ന് കേസുകളുള്ളതായും കൂടുതൽ പ്രതികളുണ്ടോയെന്ന് അന്വേഷിച്ചുവരുന്നതായും പോലീസ് അറിയിച്ചു. റൂറ എസ്.പിക്ക് ലഭിച്ച രഹസ്യവിവരത്തിന്റെ അടിസ്ഥാനത്തിൽ ആറ്റിങ്ങൽ ഡിവൈ.എസ്.പി സുനീഷ് ബാബുവിന്റെ നേതൃത്വത്തിൽ കിളിമാനൂർ സി.ഐ എസ്. സനൂജ്, എസ്.ഐ വിജിത് കെ. നായർ, എ.എസ്.ഐ ഷാജി, എസ്.സി.പി.ഒ ബിനു, ഷാജി, സി.പി.ഒ മഹേഷ്, കിരൺ, ശ്രീരാജ് എന്നിവരടങ്ങുന്ന സംഘം നൂറോളം സി.സി.ടി.വി ദൃശ്യങ്ങൾ പരിശോധിച്ചാണ് പ്രതികളെ പിടികൂടിയത്.
