കോന്നി : ശബരിമല മണ്ഡലകാലത്ത് ഗതാഗതക്കുരുക്ക് രൂക്ഷമാകുന്ന കോന്നി ട്രാഫിക് ജംഗ്ഷനില് ഗതാഗത നിയന്ത്രണത്തിന് ആവശ്യത്തിന് ഉദ്യോഗസ്ഥർ ഇല്ലാത്തത് പ്രതിസന്ധി സൃഷ്ടിക്കുന്നു. പലപ്പോഴും കോന്നി സെൻട്രൽ ജംഗ്ഷനില് ഒരു ഹോം ഗാർഡ് മാത്രമാണ് ഉണ്ടാകുക. ചില സമയങ്ങളിൽ മാത്രമാണ് പൊലീസ് ഉദ്യോഗസ്ഥരുള്ളത്. പരിചയ സമ്പന്നർ അല്ലാത്ത ഹോം ഗാർഡുകൾ ഗതാഗതം നിയന്ത്രിക്കുന്നത് മൂലം രൂക്ഷമായ ഗതാഗതക്കുരുക്കാണ് കോന്നിയിൽ അനുഭവപ്പെടുന്നത്. കോന്നി പൊലീസ് സ്റ്റേഷൻ റോഡ്, സംസ്ഥാന പാത, ആനക്കൂട് റോഡ് എന്നിവ ഉൾപ്പെടുന്ന നാല് റോഡുകൾ കൂടി ചേരുന്നതാണ് കോന്നി സെൻട്രൽ ജംഗ്ഷന്.
പലപ്പോഴും അശാസ്ത്രീയ ഗതാഗത നിയന്ത്രണം മൂലം വലിയ കുരുക്കാണ് അനുഭവപ്പെടുന്നത്. കോന്നി ഗ്രാമ പഞ്ചായത്ത് ഗതാഗത ഉപദേശക സമിതി യോഗങ്ങൾ ചേർന്ന് കോന്നിയിലെ ഗതാഗതക്കുരുക്ക് ഒഴിവാക്കാൻ ഒട്ടേറെ കാര്യങ്ങൾ ആസൂത്രണം ചെയ്തെങ്കിലും ഒന്നും നടപ്പായില്ല. കോന്നി നഗരത്തിൽ അനധികൃതമായി വാഹനങ്ങൾ പാർക്ക് ചെയ്യുന്നതും അനധികൃത കച്ചവടങ്ങളും ഗതാഗതക്കുരുക്ക് രൂക്ഷമാക്കുന്നുണ്ട്. കോന്നി ട്രാഫിക് ജംഗ്ഷ ൽനിന്ന് നാല് ഭാഗത്തേക്കുമുള്ള റോഡിൽ നിശ്ചിത ദൂരത്തിൽ പാർക്കിംഗ് കർശനമായി നിയന്ത്രിക്കുമെന്ന് തീരുമാനം എടുത്തെങ്കിലും ഒന്നും നടപ്പായില്ല.
